23-25 iyun 2025-ci il tarixlərində Mərakeş Krallığının Rabat şəhərində İslam Dünyası Təhsil, Elm və Mədəniyyət Təşkilatı (ISESCO) forumunda iştirak ilə bağlı

İştirakçılar

- Dosent Vazeh Əskərov - Azərbaycan Dövlət Neft və Sənaye Universitetinin prorektoru

-Professor İslam Mustafayev - Azərbaycan Memarlıq və İnşaat Universitetinin professor

- Şəbnəm Səfərova - Bakı Dövlət Universitetinin rektor müşaviri

- Qənirə Məmmədzadə - Azərbaycan Memarlıq və İnşaat Universitetinin Strateji planlaşdırma şöbəsinin müdiri

 

Cari ilin 22-25 iyun tarixlərində Mərakeş Krallığının Rabat şəhərində İslam Dünyası Təhsil, Elm və Mədəniyyət Təşkilatının (ISESCO) və Pakistanın Ali Təhsil Komissiyasının təşkilatçılığı, Bakı Dövlət Universitetinin (BDU) tərəfdaşlığı ilə keçirilən "İslam Dünyasında Ali Təhsilin Yenidən Təsəvvürü: İnnovasiya, Davamlılıq və Qlobal Təsir" mövzusunda İslam Dünyası Universitetlərinin prorektorların VI Forumunda iştirak etdim. Forumun əsas mövzusu İslam dünyasında ali təhsilin yenidən təsəvvür edilməsi: İnnovasiya, Davamlılıq və Qlobal Təsir olmuşdur.

Forumun ilk günü 23 iyun tarixində ISESCO-nun Rabat şəhərində yerləşən baş offisində təşkil olunmuşdu. Açılış hissəsində çıxış edən ISESCO-nun Baş Direktoru cənab Salim AlMalik, Pakistan İslam Respublikasının Planlaşdırma, İnkişaf və Xüsusi Təşəbbüslər üzrə Federal naziri Prof. Ahsan İqbal, Pakistan İslam Respublikasının Ali Təhsil Komissiyasının sədri Prof. Muxtar Əhməd Forumun əhəmiyyətini qeyd edərək islam dünyası universitet liderlərini bir araya gətirərək gələcəyin formalaşdırılması üçün vahid platformanın yaradılmasını təklif etdi.  Natiqlər eyni zamanda davamlılıq və rəqəmsal transformasiyadan başlayaraq etik liderliyə və inklüziv inkişafa qədər universitetlərin hərtərəfli inkişaf üçün katalizator kimi xidmət edə biləcəyini vurğuladılar. Qeyd edim ki, Forumda Azərbaycan Respublikasının Mərakeş Krallığındakı fövqəladə səfiri cənab Nazim Səmədov Azərbaycan nümayəndə heyəti ilə bütün görüşlərdə iştirak etdi.

Nazirlərin I plenar iclasında Avropa Elmləri üzrə Baş Katib Dr. Lidia Borrel, Pakistan İslam Respublikasının Planlaşdırma, İnkişaf və Xüsusi Təşəbbüslər üzrə Federal naziri Prof. Ahsan İqbal, Maldiv Respublikasının Ali Təhsil, Əmək və Bacarıqların İnkişafı Naziri Cənab Munim Anees, Pakistan İslam Respublikasının Ali Təhsil Komissiyasının sədri Prof. Dr. Muxtar Əhməd, Liviyanın Ali Təhsil Nazirinin müavini Dr. Saleh Algoul, Mərakeş Krallığının Ali Təhsil, Elmi Tədqiqatlar və İnnovasiyalar Nazirliyinin Elmi Tədqiqatlar və İnnovasiyalar üzrə direktoru Prof. Hamid Bouabid çıxış etdilər.

Forumun ikinci günü 24 iyun İslam dünyasında ali təhsilin yenidən təşkili: innovasiya, davamlılıq və qlobal təsir mövzusunda panel müzakirəsində BDU-nun rektorun rəqəmsallaşma və informasiya texnologiyaları üzrə müşaviri Şəbnəm Səfərova çıxış etdi. Panel çərçivəsində ali təhsilin beynəlxalq standartlara inteqrasiyası prosesində milli dəyərlərin qorunması, ənənəvi dəyərləri özündə saxlayan kurikulum modellərinin qurulması, keyfiyyət təminatı və qarşılıqlı tanınma mexanizmləri müzakirə olunub.

Növbəti panel müzakirəsi mənim iştirakım ilə Rəqəmsal Katalizator: 21-ci Əsrin Tələbəsi üçün İnnovasiya STEM Təhsili mövzusunda baş tutdu. Müzakirələrdə Azərbaycanda STEM təhsilinə Azərbaycan Respublikası Elm və Təhsil nazirliyinin xüsusi diqqətində olması istər orta təhsil istərsə də ali təhsil sisteminə istedadların təyin edilməsi və stimullaşdırılaraq fəaliyyət göstərməsi haqqında geniş məlumat verdim. Əlavə olaraq Universitetlərin sənaye müəssisələri ilə məsləhət şuralarının yaradılması, birgə tədqiqat və innovasiya mərkəzlərinin inkişaf etdirilməsi və özəl sektor mentorluq proqramları eləcə də qonaq mühazirəçi və seminarların, startap layihələrin inkişaf etdirilməsini vurğuladım.

Forumun son günü Pakistan İslam Respublikasının İndus Universitetinin rəhbəri və Pakistan İpək və Rayon Assosiasiyasının sədri Xalid Amin Sheikh ilə görüşüm baş tutdu. Universitetlərimiz arasında əlaqələrin genişləndirilməsi və inkişaf etdirilməsi üçün sədr rəhbərlik etdiyi Universitet ilə ADNSU arasında əvvəlcədən hazırlanmış Anlaşma Memorandumun iki nüsxəsini eləcə də ISESCO və Pakistanın Ali Təhsil Komissiyasının təşkilatçılığı ilə İslam Dünyasında Ali Təhsilin Yenidən Təsəvvürü: İnnovasiya, Davamlılıq və Qlobal Təsir" mövzusunda İslam Dünyası Universitetlərinin prorektorların VI Forumunda fəal iştirakıma görə Sertifikat və Qiymətləndirmə ilə təltif olundum.

Növbəti gün 25 iyun Azərbaycan universitetlərindən ibarət nümayəndə heyəti Mərakeşin aparıcı universitetlərindən biri olan İbn Tofail Universitetində olub. Universitetlərin müxtəlif fakultələri arasında müvafiq ixtisaslar üzrə müəllim və professorların qonaq professor və qonaq mühazirçi qismində  mobilliyinin təmin edilməsi eləcə də tələbə mobilliyi müzakirə edilmişdir. Gələcəkdə Universitetlərin Elm Komitələri tərəfindən sazişlərin təsdiq edilməsi və ortaq mövzuların birgə işlənməsinə dair Anlaşma Memorandumlarının imzalanmasına dair fikirlər səsləndirilmişdir. Görüşlərdə həmçinin informatika təhlükəsizliyi sahəsində doktorantların birgə rəhbərlik ilə iki ölkənin professorlarından ibarət heyət tərəfindən hazırlanması məsələləri də müzakirə olunub.

 Səfər ərzində ISESCO-ya üzv dövlətlərdən dəvət edilmiş 10-la universitet rəhbərliyi ilə danışıqlar aparılmış və ADNSU haqqında geniş məlumat verilmişdir. Forumda iştirak ADNSU-nun beynəlxalq akademik əməkdaşlığının gücləndirilməsi, elmi potensialının artırılması, eləcə də müxtəlif universitetlər ilə ali təhsil modelinin daha da inkişaf etdirilməsi istiqamətində mühüm əhəmiyyət kəsb etmişdir.

      

 

Azərbaycan Dövlət Neft və Sənaye Universitetinin

strateji məsələlər üzrə prorektoru dosent Vazeh Əskərov