Ümumilli Lider Heydər Əliyevin anadan olmasının 100-cü ildönümünə həsr olunmuş “Heydər Əliyev və Yeni Azərbaycan” mövzusunda

Konfrans (çıxış) 

9 dekabr 2023

  Dr. Vazeh Əskərov

  Yeni Azərbaycan Partiyasının İdarə heyətinin üzvü,

  Azərbaycan Dövlət Neft və Sənaye Universitetinin v.m.i.e. rektor, dosent

 -Hörmətli Yeni Azərbyacan Partiyası sədrinin müavini, Mərkəzi aparatın rəhbəri, Tahir müəllim!

- Hörmətli Elm və Təhsil Naziri Emin müəllim!

- Hörmətli YAP İdarə Heyətinin üzvləri, siyasi həmfikirlər!

- Əziz tələbələr, xanımlar və cənablar!

Hər birinizi Ümumilli Lider Heydər Əliyevin anadan olmasının 100-cü ildönümünə həsr olunmuş “Heydər Əliyev və Yeni Azərbaycan” adlı konfransda salamlamaqdan məmnun olduğumu bildirirəm.

        Təqribən 1 il əvvəl, 2022-ci il noyabrın 28-də Azərbaycan Respublikasının Prezidenti, cənab İlham Əliyevin imzaladığı Sərəncamla 2023-cü il “ölkəmizdə Heydər Əliyev ili” elan olunmuşdur. Müasir Azərbaycan Respublikasının banisi, ölkəmiz və vətəndaşlarımızın hər birinin həyatında özünün misilsiz xidmətləri ilə dərin iz buraxmış Ulu öndərə böyük məhəbbət və dərin ehtiram bəsləyən xalqımız bu qərarı xoş ovqat və böyük sevinclə qarşılamışdır. Başa çatmaqda olan 2023-cü ilin bu günündən dönüb geriyə baxdıqda “Heydər Əliyev ili” çərçivəsində, istər ölkəmizdə, istərsə də ölkəmizin hüdudlarından kənarda xalqımızın Ümummilli liderimizin xatirəsini minlərlə konfrans, forum, yarış və müsabiqələr, sərgilər və s. bu kimi tədbirlərlə minnətdarlıq hissi ilə yad etdiyinin şahidi oluruq. Cari ildə Azərbaycan Dövlət Neft və Sənaye Universitetində Ulu öndərin 100-illiyinə həsr olunmuş 50-dək müxtəlif konfrans, forum, müsabizə keçirilmişdir. Onların bir qismi universitet daxili, bir qismi beynəlxalq tərəfdaşlarımızla birgə ölkəmizin hüdudlarında kənarda təşkil olunmuşdur. Ulu öndərin 100 illiyinə həsr olunmuş tədibrlərin arasında Yeni Azərbaycan Partiyası ilə birgə təşkil olunmuş konfransın, Hakaton yarışmasının olmasını böyük qürur hissi ilə vurğulayıram.

    Yeni Azərbaycan Partiyasının təşəbbüsü ilə bu gün “Heydər Əliyev və Yeni Azərbaycan” adlı konfrans Azərbaycan Dövlət Neft və Sənaye Universitetində, yəni ali məktəbdə, tələbə və gənclərimizin iştirakı ilə keçirilir. Bu adda konfrans elə belə bir məkanda, belə bir auditoriyanın iştirakı ilə keçirilməlidir. Belə bir nəcib fəaliyyətin universitetimizlə birgə təşkil olunması haqda qərar verdiyinə görə Azərbaycan Dövlət Neft Sənaye Universitetinin çoxminli tələbə və müəllim heyəti adından Yeni Azərbaycan Partiyasına öz minnətdarlığımı bildirirəm.

   Ötən əsrin 70-ci illərindən başlayaraq XXI əsrin əvvəllərinədək ölkəmiz üçün taleyüklü bir dövrdə öz adını əməlləri, cəsarətli addımları və milli təfəkkürü ilə Azərbaycan tarixinə həkk etmiş Heydər Əliyevin çoxşaxəli fəaliyyəti xalqımızın taleyində əbədi iz qoymuşdur.

        Azərbaycan 1991-ci ildə dövlət müstəqilliyini bərpa edtikdən sonra ölkəmiz onu itirmək təhlükəsi qarşısında qalmışdır. Ölkədə müharibə gedirdi, idarəçilik isə yalnız xüsusi maraqlara xidmət edir və yox dərəcəsində idi, respublikada xaos, anarxiya hökm sürürdü. Yüz minlərlə insanın arzusu Heydər Əliyevin Bakıya dönüşü və xalqa rəhbərliyi idi. Yeganə nicat yolunu Ulu öndərin qayıdışında görən Azərbaycan xalqı onu təkidlə hakimiyyətə çağırırdı. Təəssüf olsun ki, o həm vaxtilə özünün vəzifə verdiyi Azərbaycanın o zamankı hakimiyyət nümayəndələri  tərəfindən təqib olunmağa başladı. Eyni zamanda, xalq azadlıq hərəkatına yamaq kimi qoşulmuş cəbhəçilər də Heydər Əliyevi gözdən salmağa cəhd edirdilər, amma heç zaman buna nail ola bilmədilər.

        Belə bir şəraitdə, “91-lər” adlanan bir qrup ziyalı, əslində, bütün xalqın iradəsini həyata keçirərək Azərbaycanın müstəqillik mübarizəsinin tarixində dönüş yaratdı. Tarixi reallıq bundan ibarətdir ki, Heydər Əliyevin rəhbərliyi ilə yaranmış Yeni Azərbaycan Partiyası xalqın müstəqillik uğrunda apardığı mübarizənin layiqli aparıcı siyasi qüvvəsi kimi meydana çıxdı. Azərbaycan xalqının düşüncəsində əsl milli azadlıq və müstəqillik simvolu olmuş Heydər Əliyev nəhayət Azərbaycan dövlətinə rəhbərliyə qayıtdı.

        1993-cü ilin 3 oktyabr tarixində keçirilən seçkilərdə xalqın böyük etimadı əsasında Azərbaycan Respublikasının Prezidenti seçilən Heydər Əliyev milli maraqlardan irəli gələn strateji hədəfləri uğurla reallaşdırmaqla ölkənin xilasına, rifah və tərəqqi yoluna çıxmasına, respublikamızın əsl müstəqillik – de-fakto müstəqillik qazanmasına nail oldu.

        Dövlət başçısının 2023-cü ilin “Heydər Əliyev İli” elan edilməsi haqqında Sərəncamında qeyd edildiyi kimi, “Heydər Əliyev öz xalqını zamanın mürəkkəb tarixi-siyasi sınaqlarından uğurla çıxarmış və ardıcıl mübarizə apararaq onu müstəqilliyə qovuşdurmuş qüdrətli şəxsiyyətdir. Azərbaycan xalqı yeni əsrə və yeni minilliyə məhz Heydər Əliyev zəkasının işığında qədəm qoymuşdur”.

        Ulu öndərin fitri liderlik istedadı, fenomenal hafizəsi, incə hissetmə və duyma qabiliyyəti, nüfuzedici natiqlik bacarığı, dərin və ətraflı biliyi ona əsaslandırılmış, bitkin qərarlar qəbul etməyə, insanların beyninə və qəlbinə asanlıqla yol tapmağa, geniş xalq kütlələri ilə istənilən səviyyədə ünsiyyət qurmağa və onları öz arxasınca aparmağa imkan vermişdir.

        Ulu Öndərin neft strategiyasının düzgün həyata keçirilməsi ilə ölkənin daxili və xarici siyasətinin düzgün istiqamətdə davam etdirilməsi kimi mühüm prioritet məsələlərdən sayılır. “Əsrin müqaviləsi” ilə həlledici neft strategiyası Azərbaycanın uzunmüddətli inkişafına yol açmış oldu və Azərbaycanın siyasi və iqtisadi qüdrətini artıraraq, sonrakı illərdə onun təşəbbüsü və liderliyi ilə regionun və Avropanın enerji təhlükəsizliyini təmin edəcək neçə-neçə yeni transmilli enerji və nəqliyyat layihələrinin həyata keçirilməsinə şərait yaratmışdır. Bu gün Azərbaycan özünün zəngin enerji ehtiyatlarından səmərəli istifadə etməklə beynəlxalq miqyasda enerji təhlükəsizliyinin təmin edilməsində mühüm rol oynayan başlıca faktorlardan birinə çevrilmişdir.

    Ümummilli lider özünün zəngin dövlətçilik təcrübəsinə əsaslanaraq gərgin siyasi fəaliyyəti nəticəsində Azərbaycan-Ermənistan Dağlıq Qarabağ probleminin tənzimlənməsi üçün beynəlxalq və milli hüquqi baza, illər sonra, 2020-ci ildə möhtərəm Prezidentimiz, Müzəffər Ali Baş Komandanımız cənab İlham Əliyevin rəhbərliyi ilə qazanacağımız tarixi Qələbənin təməllərini yaratdı, Bu gün xalqımız Ulu Öndər Heydər Əliyevin 100 illik yubileyini ona olan böyük sevgi və ehtiram hissi ilə yanaşı, müzəffər xalq olaraq böyük qürur, fəxarət və möhtərəm Prezidentimiz cənab İlham Əliyevə minnətdarlıq hissləri ilə qarşılayır.

        2 ay əvvəl uğurlu antiterror əməliyyatları sayəsində Azərbaycan Respublikasının üçrəngli bayrağı Xankəndində dalğalanmağa başladı və müstəqillik qazandığımızdan bəri nəhayət ki, Azərbaycanın dövlət süverenliyi ölkənin bütün ərazisində təmin edildi.

        Çıxışımı Ulu Öndər Heydər Əliyevin 2003-cü ildə tarixi müraciətində vurğuladığı kəlamları və bu dahi şəxsiyyətin siyasi varisi, Prezidentimiz, Müzəffər  Ali Baş Komandan İlham Əliyevin Şuşanın azad olunması müjdəsini Şəhidlər Xiyabanından xalqa çatdırarkən bəyan etdiyi fikirlərlə davam etdirmək istəyirəm. O zaman ulu öndərin tarixi müraciətində qeyd olunurdu: "İnanıram ki, mənim axıra çatdıra bilmədiyim taleyüklü məsələləri, planları, işləri İlham Əliyev başa çatdıra biləcək. Mən Ona Özüm qədər inanıram və gələcəyinə böyük ümidlər bəsləyirəm". Şuşanın azad edilməsi müjdəsini verən Prezident İlham Əliyev isə bildirmişdi ki, “mən bu gün, eyni zamanda, ulu öndər Heydər Əliyevin məzarını ziyarət etdim, onun ruhu qarşısında baş əydim. Ürəyimdə dedim, xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Şəhidlərimizin, Ulu Öndərin ruhu şaddır bu gün!”

        Ümummilli lider Heydər Əliyevin vəsiyyəti, Prezidentimiz, Müzəffər Ali Baş komandan İlham Əliyevin vədi Azərbaycan xalqının özünün soy kökünə, adət-ənənələrinə nə dərəcədə sıx bağlı olmasının əyani təzahürüdür. 44 günlük Vətən müharibəsində qazandığımız zəfər və torpaqlaımızın azad olunması Prezident İlham Əliyevin uğurlu və uzaqgörən siyasətinin real nəticəsi olmaqla yanaşı, həmçinin ulu öndər Heydər Əliyev ideyalarının təntənəsidir.

        Heydər Əliyev öz zəngin dövlətçilik təcrübəsi və bənzərsiz liderlik keyfiyyətləri ilə Azərbaycanı müstəqillik yolunda inkişaf etdirməyə - müstəqilliyi daimi, dönməz və əbədi etməyə müvəffəq olub, xalqımıza qürur və iftixar mənbəyi olan çoxsaylı tarixi nailiyyətlər qazandırıb, yeni, müasir və müstəqil Azərbaycan reallığını yaratmış müdrik dövlət xadimidir: "Prezident İlham Əliyevin 2023-cü ilin ölkəmizdə “Heydər Əliyev İli” elan edilməsi haqqında Sərəncamında qeyd edildiyi kimi, “müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir. Bu müqəddəs mirası qoruyub saxlamaq hər bir azərbaycanlının şərəfli vəzifəsidir”.

        Vətən müharibəsində qazandığımız zəfər bütün dünyaya əyani olaraq bir də onu göstərdi ki, ölkəmizdə müasir, qüdrətli və qalib Azərbaycanın sağlam bünövrəsi yaradılıb – milli ruhda tərbiyə almış, vətənpərvər gənc nəsil yetişib. Müasir vətənpərvər gəncliyin gerçək nümunəsi Vətən müharibəsində torpaqlarımızın azadlığı uğrunda şəhid olmuş universitetimizin tələbələrimizdir. Hər gün minlərlə tələbə ADNSU şəhidlərinin xatirə guşəsinin önündən keçir və özünə dogma Vətənimiz üçün layiqli vətəndaş kimi yetişmək andı verir. Vətənini sevən, onun tərəqqisinə çalışan gənclik ulu öndərin prinsipləri əsasında yetişən gənc nəsildir.

    Bu gün işğaldan azad edilmiş, üçrəngli bayrağımızın qürurla və əzəmətlə dalğalandığı ərazilərdə nəhəng bərpa-quruculuq işləri görülür, Müzəffər Ali Baş Komandan İlham Əliyev ilə Birinci vitse-prezident Mehriban xanım Əliyevanın həmin torpaqlara hər bir səfəri təntənəli Zəfər yürüşünün davam etdiyini göstərir, qalib Azərbaycan Böyük Qayıdışı, dayanıqlı və layiqli məskunlaşmanı yüksək səviyyədə təmin etmək iqtidarında olduğunu bütün dünyaya nümayiş etdirir. Bütün Azərbaycan gəncliyi, yüzlərlə gənc mühəndis işağldan azad olunmuş torpaqlarımıza həyatın yenidən qayıtması üçün çalışır.

        Burada toplaşanların yəqin ki, hamısı bilir – Ümummilli lider Heydər Əliyev 1939-1941-ci illərdə o zaman Azərbaycan İndustrial İnstitututu – Azİİ adını daşıyan universitetimizdə təhsil alıb. Ali məktəbin 80 illik yubileyi zamanı, hazırda olduğunuz bu zalda çıxışı zamanı ulu öndər bildirmişdi ki, “mənim üçün hər bir ali məktəb doğmadır və hər bir ali məktəbin öz yeri vardır. Amma, mən bu sözləri deməyə bilmirəm, indiki Neft Akademiyası (yəni, indiki ADNSU) vaxtilə bütün ali məktəblərə nümunə idi. Mən istərdim ki, o, bu gün də nümunə olsun.”

     Müasir dünyada ali təhsilin mahiyyəti, texnologiyaları dəyişib, çoxsaylı universitetlər yaradılıb, gənclərin qarşısında ölkədə, yoxsa digər dövlətlərin ali məktəblərində təhsil almaq seçimi vardır, rəqabət böyükdür. Son illər ərzində ölkədə təhsil sahəsində aparılan islahatlar sayəsində ali təhsil sektorunda ciddi irəliləyişlər vardır. 2023-cü ildə Azərbaycan Dövlət Neft və Sənaye Universiteti ilk dəfə olraq nüfuzlu QS agentliyinin reytinqlərində yer alıb. Biz bütün fəaliyyətimizlə çalışacağıq ki, Ümummilli liderin söylədiyi kimi, başqalarına nümunə olan universitet olaraq inkişaf edək.

        Fürsətdən istifadə edib tədbirin ərsəyə gəlməsi üçün Yeni Azərbaycan Partiyasına, hər bir iştirakçı dərin minnətdarlığımı bildirirəm.

 

Ümumilli Lider Heydər Əliyevin 100 illik yubileyinə həsr olunmuş “Keçmişə ehtiram, gələcəyə inamla”: Heydər Əliyev irsindən bəhrələnən müasir Azərbaycan gəncliyi (çıxış) 

21 oktyabr 2023 

  Dr. Vazeh Əskərov

  Yeni Azərbaycan Partiyasının İdarə heyətinin üzvü,

  Azərbaycan Dövlət Neft və Sənaye Universitetinin v.m.i.e. rektor, dosent

 -Hörmətli Yeni Azərbyacan Partiyası sədrinin müavini, Mərkəzi aparatın                 rəhbəri, Tahir müəllim!

- Hörmətli Nazirlər!

- Hörmətli rektorlar!

- Əziz tələbələr, xanımlar və cənablar!

Hər birinizi Ümumilli Lider Heydər Əliyevin 100 illik yubileyinə həsr olunmuş “Keçmişə ehtiram, gələcəyə inamla”: Heydər Əliyev irsindən bəhrələnən müasir Azərbaycan gəncliyi tədbirində salamlamaqdan məmnun olduğumu bildirirəm.

Hər bir Azərbaycan gənci hər şeydən çox, hər şeydən artıq müstəqil Azərbaycanın bu günü, gələcəyi haqqında düşünməlidir!

Ümummilli Lider Heydər Əliyev

          Qürurla qeyd edə bilərik ki, istər sovet dövründə istərsə də Azərbaycan 1991-ci ildə müsəqillik əldə etdikdən sonra azərbaycanlı gənclərin xaricdə təhsil almağa göndərilməsi ənənəsinin əsası Ümummilli Lider Heydər Əliyev tərəfindən qoyulmuş və sonralar Ulu Öndərin ideyalarının layiqli davamçısı Azərbaycan Prezidenti İlham Əliyev tərəfindən uğurla davam etdirilməkdədir. Azərbaycan xalqının Ümummilli Lideri, görkəmli ictimai-siyasi xadim Heydər Əliyevin dövlətçilik fəaliyyətində təhsilə diqqət xüsusi yer tutur. XIX əsrin sonu və XX əsrlərdə azərbaycanlıların təhsil almağa maraqları artmış, müxtəlif Avropa və Rusiya Universitetlərinə tələbələrin göndərilməsi baş vermişdir. Lakin təəssüf hissi ilə qeyd etməliyik ki, istər XIX əsrdə, istərsə də ötən əsrin əvvəllərində xaricə getmiş və ya göndərilmiş bir çox azrəbaycanlı gəncin taleyi acanıcaqlı sonluq ilə bitmiş, bəziləri xarici ölkələrdə böyük çətinliklər ilə həyatlarını başa vurmuş, digərləri isə ölkəyə qayıtdıqdan sonra sovet represiya maşınından xilas ola bilməmişdirlər.

Azərbaycanın böyük oğlu, müstəqil Azərbaycan dövlətinin memarı və qurucusu, ümummilli lider Heydər Əliyevin hələ 1969-cu ildə Azərbaycan Komunist Partiyası Mərkəzi Komitəsinin birinci katibi seçilməsi ölkəmiz üçün dönüş nöqtəsi olmuş və məhz elə ilk günlərdən bütün sahələrdə islahatların aparılması ilə respublikamızın inkişaf strategiyasının əsası qoyulmuşdur. Çox qısa bir zamanda Azərbaycanın keçmiş ittifaq ölkələri arasında sənaye istehsalının artım sürətinə görə ilk yerə çıxması bütün mənalarda ölkə rəhbəriliyin təkcə respublikamızda deyil eləcə də, bütün SSRİ miqyasında nüfuzunun artmasına gətirib çıxartmışdır.

1970-1982-ci illər ərzində Azərbaycanda 5 yeni ali məktəb yaradılmış o cümlədən yeni ixtisaslar, kafedralar və laboratoriyalar fəaliyyətə başlamışdır. Beləliklə, 1960-ci illərdə Respublikada 12 ali məktəb fəaliyyət göstərirdisə, 1982-ci ildə Azərbaycanda ali təsil məktəblərin sayı artmış və təhsil alanların sayı 70 mindən 100 minə yüksəlmişdir. 1970-ci ildən etibarən hər il 800- 900 nəfər azərbaycanlı gənc SSRİ-nin nüfuzlu ali təhsil məktəblərində təhsil almağa göndərilmişdir. Ən əsası isə əvvəlki illərdən fərqli olaraq xarici universitetlərdə təhsil alan tələbələrin milli tərkibi 97.7 faiz azərbaycanlılardan ibarət idi, halbuki əvvəlki illərdə respublikadan kənarda təhsil almağa göndərilənlər arasında azərbaycanlıların payı cəmi 40%-ə çatırdı.

“Bizim uşaqlarımız, gənclərimiz hər bir fənni bilməlidirlər və xüsusən o fənlərdə ki, ixtisaslaşmaq istəyirlər, onu daha da yaxşı bilməlidirlər... Ana dilini bilməlidirlər, ədəbiyyatımızı bilməlidirlər, bizim tariximizi bilməlidirlər, bizim mədəniyyətimizi bilməlidirlər”. Faktiki olaraq, Ümummilli liderin bu kəlamları onun ölkənin strateji inkişafını Azərbaycan gənclərinin vətənpərvərlik ruhunda tərbiyə olunmasında və peşəkar mütəxəssis kimi yetişməsində gördüyünün təsdiqidir.

Bu gün bir daha şahid oluruq ki, Ulu Öndərin təhsil siyasəti Azərbaycan Respublikasının Prezidenti İlham Əliyev və Birinci vitse-prezident Mehriban Əliyeva tərəfindən uğurla davam etdirilir. Dövlət başçısı həmişə vurğulayır ki, dövlətin, xalqın gələcəyi intellektual inkişafla bağlıdır və elmə qoyulan sərmayə millətin sabahına xidmət edir. Bu yöndə ölkənin neft strategiyasından əldə olunan gəlirlərin insan kapitalına çevrilməsi sosial-iqtisadi islahatların davamlılığının uğurla gerçəkləşdirilməsinə xidmət edir. Ölkə rəhbəri müxtəlif ölkələrin təcrübəsini müqayisə edərək uğur qazanmağın əsas səbəblərini neft-qaz ehtiyatları ilə deyil, elmə, biliyə, yiyələnməklə əlaqələndirərək qeyd edir ki, təbii ehtiyatların və insan kapitalının sintezi Azərbaycanı çox qabaqcıl, müasir ölkəyə çevirəcəkdir. Təhsilə qoyulan vəsaitin ölkənin hərtərəfli inkişafına, iqtisadiyyatın, davamlı tərəqqinin təmin olunmasına əsaslı zəmin yaratdığını vurğulayan dövlət başçısı təhsil sisteminin müasirliyi və effektivliyini dayanıqlı sosial-iqtisadi inkişaf strategiyasının reallaşmasının əsas şərtlərdən biri kimi səciyyələndirir.

       Dövlət başçısı 15 oktyabr 2003-cü ildəki seçkilərdə tam qələbə qazandıqdan sonra 31 oktyabr 2003-cü ildə andiçmə mərasimində, “Mən Azərbaycanın xoşbəxt gələcəyinə inanıram. Əminəm ki, ölkəmiz bundan sonra da inkişaf edəcək, daha da güclənəcəkdir” qeyd edən İlham Əliyev son 18 ildə qarşıya qoyduğu bütün strateji məsələlərə nail olmuşdur. Bundan əlavə dövlət başçısı həmişə vurğulayır ki, “dövlətin, xalqın gələcəyi intellektual inkişafla bağlıdır və elmə qoyulan sərmayə millətin sabahına xidmət edir”. Bu yöndə ölkənin neft strategiyasından əldə olunan gəlirlərin insan kapitalına çevrilməsi sosial-iqtisadi islahatların davamlılığınım uğurla gerçəkləşdirilməsinə xidmət edir. Ölkə rəhbəri müxtəlif ölkələrin təcrübəsini müqayisə edərək uğur qazanmağın əsas səbəblərini neft-qaz ehtiyatları ilə deyil, elmə, biliyə, yiyələnməklə əlaqələndirərək qeyd edir ki, təbii ehtiyatların və insan kapitalının sintezi Azərbaycanı çox qabaqcıl, müasir ölkəyə çevirəcəkdir. Təhsilə qoyulan vəsaitin ölkənin hərtərəfli inkişafına, iqtisadiyyatın, davamlı tərəqqinin təmin olunmasına əsaslı zəmin yaratdığını vurğulayan dövlət başçısı təhsil sisteminin müasirliyi və effektivliyini dayanıqlı sosial-iqtisadi inkişaf strategiyasının reallaşmasının əsas şərtlərdən biri kimi səciyyələndirir. 

Prezident İlham Əliyevin Müzəffər Ali Baş Komandan kimi 44 günlük “Dəmir yurmuq” Vətən müharibəsi zamanı xalqına müraciət etməsi və bütün çıxışlarında xalq ilə bir olaraq işğalçılara qarşı bütün cəbhələrdə mübarizə aparması  “Azərbaycan xalqı və dövləti heç vaxt işğal faktı ilə barışmayacaq” fikirləri bir daha öz təsdiqini tapdı. II Qarabağ müharibəsi zamanı Azərbaycan Silahlı Qüvvələrinin ölkəmizin ərazi bütövlüyünü bərpa etməsi Azərbaycan tarixinə şanlı hərflərlə yazıldı və tarixə əbədi olaraq həkk olundu. Və Azərbaycan ərazi bütövlüyünü təmin etməklə tarixi ədalət bərqərar oldu, xalqın qürur və milli ləyaqəti bərpa olundu. Daha bundan sonra cənab Prezidentin də deyidiyi kimi “Bizi daha heç kim və heç nə dayandıra bilməz” və ölkəmiz bündan sonra da inkişaf edəcək və yeni uğurlara imza atacaqdır.

Ümumilli liderin 100 illik yubileyi ərəfəsində Azərbaycan Dövlət Neft və Sənaye Universiteti təşəbbüs ilə çıxış edərək Yeni Azərbaycan Partiyası Mərkəzi aparatının bir başa təçkilatçılığı ilə tələbələr arasında "Heydər Əliyev - 100: Mühəndislik hakatonu " intellektual yarışını təşkil etmişdir.

14-15 oktyabr tarixlərində baş tutmuş tədbir Azərbaycanda fəaliyyyət gösdərən və mühəndislik ixtisası üzrə təhsil verən universitetlərin tələbələrinin iştirakı ilə gənclərin innovasiya yönümlü poetnsialının aşkarlanması, komanda quruculuğu bacarıqlarının təkmilləşdirilməsi və innovasiya ekosistemində gənclərin iştirakının artırılması məqsədi daşıyır. İki gün davam edən yarışmada 21 ali təhsil müəssəsinin Kompyuter Elmləri və Mühəndsilik ixtisasları üzrə hər birində 4 iştirakçı olmaqla 30 komanda iştirak etmişdir.

Hakaton yarışmasının mövzuları 3 istiqamət üzrə, Ekologiya və ətraf mühit, Nəqliyyat və logistika, Texnologiya və innovasiya olmuşdur. 2 gün ərzində iştirakçılar onlara verilən tapşırıqlar üzrə layihələr icra etmiş və yarış müddətində komandalara sahə üzrə mentorlar dəstək vermişdir. Tələbələr onlara verilmiş tapşırıq əsasında kodlaşma işini təqdimat fomasında münsiflər qarşısında təqdim etmişdirlər.

Münsiflər heyəti : ADNSU, UFAZ və  eləcədə digər partnyor qurumlar tərəfindən komandaları qiymətləndirmişdir. Bu gün hər istiqamət üzrə bir qalib komanda elan olunacaq və baş sponsor “Kapital Bank ASC” tərəfindən komandalara pul mükafatı təqdim ediləcəkdir.

Fürsətdən istifadə edib tədbirin ərsəyə gəlməsi üçün Yeni Azərbaycan Partiyasına, hər bir iştirakçı Universitet rəhbərliyinə və Sponsorlara eləcədə Tədbirimizə ev sahibliyi etməyi qəbul etmiş Heydər Əliyev Mərkəzinin rəhbərliyinə dərin minnətdarlığımı bildirirəm.

 

“Heydər Əliyev və Yeni Azərbaycan” mövzusunda konfrans keçirilib

09 Dekabr 2023    17:24

Dekabrın 9-da Yeni Azərbaycan Partiyasının (YAP) Mərkəzi Aparatı və Azərbaycan Dövlət Neft və Sənaye Universitetinin (ADNSU) birgə təşkilatçılığı ilə Ümummilli Lider Heydər Əliyevin anadan olmasının 100-cü ildönümünə həsr olunmuş “Heydər Əliyev və Yeni Azərbaycan” mövzusunda konfrans keçirilib.

Əvvəlcə Ümummilli Lider Heydər Əliyevin universitetin foyesindəki büstü önünə əklil qoyulub, dahi şəxsiyyətin əziz xatirəsi ehtiramla anılıb.

Sonra Azərbaycan Dövlət Neft və Sənaye Universitetinin tələbələrinin əl işlərindən ibarət sərgiyə baxış keçirilib.

Tədbirdə Ulu Öndər Heydər Əliyevin və Azərbaycanın ərazi bütövlüyü uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Çıxış edən Yeni Azərbaycan Partiyası Sədrinin müavini – Mərkəzi Aparatın rəhbəri Tahir Budaqov tədbir iştirakçılarını  salamlayıb, konfransın işinə uğurlar arzulayıb. Tahir Budaqov bildirib ki, müasir müstəqil Azərbaycanın banisi, Yeni Azərbaycan Partiyasının qurucusu, xalqımızın Ümummilli Lideri, dünya şöhrətli siyasətçi və dövlət xadimi Heydər Əliyevin zəngin dövlətçilik irsinin tədqiqi, əbədiyaşayar ideyalarının öyrənilməsi, təşviqi və təbliği xüsusi əhəmiyyətə malik olmaqla daim aktual və vacib məsələlərdəndir. Prezident İlham Əliyevin Sərəncamı ilə ölkəmizdə elan edilmiş “Heydər Əliyev İli” çərçivəsində çoxsaylı tədbirlərin keçirilməsi də bu baxımdan müstəsna önəm kəsb edir.

YAP Sədrinin müavini diqqətə çatdırıb ki, Ulu Öndərin adı ilə bağlı olan və hazırda Onun siyasi varisi cənab İlham Əliyevin Sədrliyi ilə uğurla inkişaf edərək Azərbaycana böyük nailiyyətlər qazandıran Yeni Azərbaycan Partiyası da Heydər Əliyev ideyalarının təşviqi yönündə müxtəlif tədbirlər reallaşdırmaqdadır: “Cari ilin ötən dövrü ərzində həyata keçirdiyimiz tədbirlər Heydər Əliyev irsinin və ideyalarının yeni nəslə aşılanması, gənc nəslin milli-mənəvi dəyərlər əsasında, vətənpərvərlik və dövlətə sədaqət ruhunda yetişməsinə mühüm töhfə kimi qiymətləndirilə bilər. İnkaredilməz reallıqdır ki, müasir dövlətçiliyimizin sarsılmaz əsaslarını yaradan Ulu Öndər Heydər Əliyevin ideyaları Azərbaycan dövlətinin siyasi-ideoloji sütunu, xalqımızın isə tükənməz mənəvi-siyasi sərvətidir. Çünki Azərbaycanın yeni və müasir dövlətçilik tarixinin müxtəlif mərhələlərini - həm SSRİ, həm də müstəqillik dövrünü əhatə edən dönəmləri Heydər Əliyev siyasətinin xalqımızın və dövlətimizin taleyində hansı tarixi əhəmiyyətə malik olduğunu, Ulu Öndərin xidmətlərinin misilsizliyini əks etdirir. Müdrik dövlət xadimi Sovet ittifaqı dönəmində Azərbaycan SSR-in rəhbəri kimi respublikamızın intibahına müvəffəq olmaqla gələcək müstəqilliyin əsaslarını formalaşdırmışdır. Olduqca mürəkkəb şəraitdə Azərbaycan dilinin respublika konstitusiyasında dövlət dili kimi təsbit edilməsi, milli-mənəvi dəyərlərin qorunması, azərbaycançılıq ideologiyasının təşviqi isə bu baxımdan xüsusi qeyd edilməlidir. Heydər Əliyev SSRİ Nazirlər Soveti Sədrinin birinci müavini kimi fəaliyyət göstərdiyi dövrdə də ölkəmizin mənafelərini qətiyyətlə qoruyaraq xalqın firavanlığı naminə məqsədyönlü işlər görmüşdür. Müstəqillik illərində isə Ulu Öndərin zamanın çağırışlarına, milli-mənəvi dəyərlərə və dövlətçilik maraqlarına əsaslanan fəaliyyətini iki fərqli tarixi mərhələdə ayrıca dəyərləndirmək lazımdır. O, əvvəlcə Naxçıvan Muxtar Respublikası Ali Sovetinin Sədri olaraq blokada vəziyyətindəki muxtar respublikanı ağır sosial-iqtisadi şəraitdən və tənəzzüldən qurtararaq dirçəlişinə nail olmuşdur. Bu mərhələdə Onun liderliyi və xalqın dəstəyi ilə Yeni Azərbaycan Partiyasının yaradılması isə yeni və müstəqil Azərbaycan quruculuğunun əsaslarını formalaşdırmışdır. Heydər Əliyevin respublikamıza ikinci rəhbərlik dönəmini – 1993-2003-cü illəri əhatə edən dövr real dövlət müstəqilliyinin təmin olunması, Azərbaycanın sabitlik və tərəqqi yoluna qədəm qoyması, böyük Zəfərin əldə edilməsi üçün möhkəm təməllərin yaradılması ilə əlamətdardır. Bu mərhələyə nəzər yetirən Azərbaycan Prezidenti, Yeni Azərbaycan Partiyasının Sədri İlham Əliyev qeyd etmişdir: “1993-cü il müasir tariximizdə həlledici dönüş nöqtəsidir. Tam qətiyyətlə deyə bilərəm ki, əgər 1993-cü ildə Heydər Əliyev xalqın tələbi ilə hakimiyyətə gəlməsəydi, bugünkü Azərbaycanın mövcudluğu hətta şübhə altına düşə bilərdi”. Əlbəttə, Heydər Əliyevin həmin dövrdə Azərbaycanı iqtisadi böhrandan, siyasi xaosdan qurtarması, Ermənistanın işğalçılıq müharibəsinin qarşısını alması, səmərəli xarici siyasət həyata keçirməklə ölkəmizin beynəlxalq münasibətlər sistemində fəal iştirakını təmin etməsi müasir dövlətçilik tariximizin dönüş nöqtəsi olmuşdur. Bütün bu faktlar təsdiqləyir ki, Heydər Əliyev öz zəngin dövlətçilik təcrübəsi ilə Azərbaycanı müstəqillik yolunda inkişaf etdirməyə, müstəqilliyi daimi, dönməz və əbədi etməyə nail olmuş, xalqımıza çoxsaylı tarixi nailiyyətlər qazandırmaqla yeni, müasir və müstəqil Azərbaycan reallığını yaratmışdır”.

YAP Mərkəzi Aparatının rəhbəri qeyd edib ki, Heydər Əliyev siyasəti Azərbaycan xalqına ən dəyərli milli sərvətimiz olan dövlət müstəqilliyini bəxş etmiş, ölkəmizin demokratiya və sosial-iqtisadi inkişaf yolunda əmin addımlarla irəliləməsini, beynəlxalq münasibətlər sisteminin nüfuzlu dövlətinə çevrilməsini şərtləndirmişdir: “Prezident İlham Əliyevin qeyd etdiyi kimi, “Heydər Əliyev dühası bugünkü Azərbaycanın uğurlu inkişafının təməlində dayanan amildir”. Ona görə də haqlı və birmənalı olaraq qeyd edirik ki, müasir müstəqil Azərbaycan Heydər Əliyevin zəngin milli-mənəvi dəyərlərə və çoxəsrlik dövlətçilik ənənələrinə malik xalqımıza ən böyük tarixi və mənəvi-siyasi mirasıdır. 2003-cü ildə xalqımız Heydər Əliyev siyasətinə bir daha qətiyyətli dəstək verərək cənab İlham Əliyevə etimad göstərmiş, Ümummilli Liderin müəyyənləşdirdiyi yolun alternativsizliyini inamla ifadə etmişdir. Bu gün qürur və iftixarla qeyd edirik ki, zamanın Ulu Öndərə başa çatdırmağa imkan vermədiyi işləri Onun siyasi varisi cənab İlham Əliyev müvəffəqiyyətlə yerinə yetirmiş, Heydər Əliyevin arzuları reallığa çevrilmişdir. Prezident İlham Əliyevin ölkəmizə rəhbərlik etməsi ilə müasir dövlətçilik tariximizdə keyfiyyətcə yeni mərhələ başlanmış, ardıcıl nailiyyətlərə imza atılmış, xalq-iqtidar birliyi daha da möhkəmlənmiş, Azərbaycan regionda aparıcı güc mərkəzinə və lider dövlətə, ən əsası isə qalib ölkəyə çevrilmişdir. Heydər Əliyev siyasətinin tarixi ənənələrə, milli-mənəvi dəyərlərə, dövlətçilik maraqlarına və çağdaş reallıqlara uyğun davam etdirilməsi Azərbaycanı sabitlik və sürətli inkişaf yoluna çıxarmış, məhz bu siyasət nəticəsində iqtisadi gücünü, siyasi nüfuzunu, hərbi qüdrətini artıran, beynəlxalq mövqeyini möhkəmləndirən Azərbaycan Qələbə zirvəsinə yüksəlmişdir. Bir sözlə, Heydər Əliyev siyasətinin zirvə nöqtəsi 30 il ərzində Ermənistanın işğalı altında qalmış torpaqların azad olunması, ölkəmizin ərazi bütövlüyünün bərpası və suverenliyinin bərqərar edilməsidir”.

Tahir Budaqov vurğulayıb ki, 44 günlük Vətən müharibəsində əldə etdiyimiz möhtəşəm qalibiyyətin ardınca “Heydər Əliyev İli”ndə Prezident İlham Əliyevin komandanlığı ilə qazanılan növbəti hərbi-strateji və diplomatik Qələbə nəticəsində üçrəngli bayrağımızın işğaldan azad edilmiş digər ərazilərdə olduğu kimi, Xankəndidə, Xocalıda, Ağdərədə, Xocavənddə dalğalanması, Azərbaycanın konstitusiya quruluşunun bərpası böyük mənəvi-siyasi əhəmiyyətə malik tarixi hadisədir: “Bu, Heydər Əliyev siyasətinin təntənəsi, Ümummilli Liderin vəsiyyətinin Prezident, Müzəffər Ali Baş Komandan, Yeni Azərbaycan Partiyasının Sədri İlham Əliyev tərəfindən yerinə yetirilməsidir. Prezident İlham Əliyevin Heydər Əliyev ideyalarına əsaslanan uzaqgörən siyasətinin real nəticəsi olan Böyük Qayıdış prosesi də çoxəsrlik dövlətçilik tariximizin ən parlaq səhifələrindən birinə çevrilməklə daha güclü Azərbaycanın etibarlı bünövrəsini formalaşdırmaqdadır”.

“Bu gün tarixi dəyərlərlə müasir reallıqların vəhdətinə əsaslanan, azərbaycançılıq ideologiyasına və dövlətçilik ideyasına söykənən Heydər Əliyev siyasəti Azərbaycana parlaq nailiyyətlər qazandırır, milli qüdrətimiz günbəgün artır. Dövlət başçısının qeyd etdiyi kimi, “Azərbaycanda hərtərəfli inkişaf təmin edilmişdir. Bunun əsas şərti ondan ibarətdir ki, biz Ulu Öndərin yolu ilə gedirik. Onun qoyduğu yol yeganə düzgün yoldur və Azərbaycanın müstəqillik tarixi bunun əyani sübutudur”. Bütün bu nailiyyətlər və qürurverici reallıqlar təsdiqləyir ki, Prezident, Yeni Azərbaycan Partiyasının Sədri cənab İlham Əliyev Ulu Öndərin siyasətinə sadiqdir və sözü imzası qədər dəyərlidir”,-deyən YAP Mərkəzi Aparatının rəhbəri əlavə edib ki, Azərbaycan xalqı hər zaman Heydər Əliyev siyasətinə, Onun parlaq ideyalarına sədaqət nümayiş etdirmişdir.

Tahir Budaqov söyləyib ki, cəmiyyətin bütün təbəqələrini təmsil edən vətənpərvər insanlar kimi, Azərbaycan gəncliyi də bu gün Ulu Öndərin ideyalarının reallaşmasında mühüm rola malikdir: “Prezident İlham Əliyevin milli maraqlara əsaslanan siyasətinə qətiyyətli dəstək ifadə edən gənclərimizin dövlətçilik, azərbaycançılıq, vətənpərvərlik prinsipləri əsasında çalışmaları, üzərlərinə düşən vəzifələri layiqincə yerinə yetirmələri Heydər Əliyev irsinə və ideyalarına sədaqət nümunəsi olmaqla yanaşı, Azərbaycanın inkişafına, qarşıda duran milli hədəflərin reallaşmasına önəmli töhfə kimi yüksək qiymətə layiqdir. Bilirsiniz ki, mütərəqqi baxışlara, zəngin dövlətçilik təcrübəsinə malik olan Ulu Öndər Heydər Əliyev hər zaman tarixi ənənələrə, milli-mənəvi dəyərlərə, dövlətçilik maraqlarına və zamanın çağırışlarına uyğun siyasət həyata keçirməklə gənclərin inkişafına da xüsusi önəm vermişdir. O, intellektual, milli-mənəvi dəyərlərə sadiq, vətənpərvər gəncliyin yetişməsinə böyük diqqət yetirmiş, bu istiqamətdə ardıcıl və məqsədyönlü tədbirlər həyata keçirməklə bugünkü – müasir, qüdrətli və qalib Azərbaycanın sağlam bünövrəsini yaratmışdır. Ona görə də Azərbaycan gəncliyinin Heydər Əliyev siyasətinə sadiq - qəlbən bağlı olması ilə yanaşı, Ulu Öndərin ideyalarının öyrənilməsi və təşviqində yüksək fəallıq nümayiş etdirmələri böyük önəmə malikdir. Prezident İlham Əliyevin 2023-cü ilin ölkəmizdə “Heydər Əliyev İli” elan edilməsi haqqında Sərəncamında qeyd edildiyi kimi, “müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir. Bu müqəddəs mirası qoruyub saxlamaq hər bir azərbaycanlının şərəfli vəzifəsidir”. Təbii ki, milli-mənəvi və siyasi-ideoloji əhəmiyyətə malik bu işdə gənclərin də üzərinə mühüm vəzifələr və böyük məsuliyyət düşür”.

“Şübhə yoxdur ki, 2024-cü ilin fevralın 7-ə təyin edilmiş növbədənkənar prezident seçkiləri də yeni, müasir və müstəqil Azərbaycanın qurucusu olan Ümummilli Lider Heydər Əliyevin ideyalarına, Prezident, Müzəffər Ali Baş Komandan İlham Əliyevin siyasətinə xalqın dəstəyinin növbəti təzahürü olacaq və bu seçkilərin yüksək vətəndaş fəallığı şəraitində, azad və demokratik keçirilməsinə Azərbaycan gəncliyi də öz töhfələrini verəcəkdir. Heydər Əliyev ideyalarına sədaqət nümayiş etdirərək və Prezident İlham Əliyevin ətrafında sıx birləşərək daha güclü Azərbaycan naminə fəaliyyətinizdə hər birinizə yeni-yeni uğurlar arzulayır, konfransın Ulu Öndərin ideyalarının təşviqi baxımından faydalı olacağına inamımı ifadə etmək istəyirəm”,- deyə Tahir Budaqov vurğulayıb.

Sonra elm və təhsil naziri Emin Əmrullayev çıxış edərək 2023-cü ilin ölkəmizin tarixində ən şanlı illərdən biri olduğunu vurğulayıb: “Azərbaycanın ərazi bütövlüyünün və suverenliyinin tam təmin edilməsi xalqımızın tarixində şanlı səhifə kimi qalacaq. Bu il ərzində Azərbaycanın müxtəlif təhsil müəssisələrində Ulu Öndər Heydər Əliyevin anadan olmasının 100 illiyi ilə əlaqədar tədbirlər keçirilir. Azərbaycan tarixi yeni baxış əsasında öyrənilir, Ulu Öndərin ideyaları təşviq olunur”.

Emin Əmrullayev bildirib ki, müstəqil Azərbaycanın bugünkü inkişaf səviyyəsinə çatmasında, dünya birliyində layiqli yer tutmasında Ulu Öndər Heydər Əliyevin müstəsna xidmətləri olub. O qeyd edib ki, Ümummilli Liderin Azərbaycanda elm və təhsilin inkişafında xüsusi rolu var. Məhz Heydər Əliyev tərəfindən 1970-ci illərdə respublikamızda təhsil islahatlarına başlanılmışdı. Nazirin sözlərinə görə, Heydər Əliyevin təhsil şəbəkəsinin artırılması, Azərbaycan vətəndaşlarının keçmiş Sovet İttifaqının ali məktəblərində təhsil alması istiqamətində fəaliyyəti mühüm əhəmiyyət kəsb edir: "Ulu Öndərin ölkəmizə rəhbərliyi dönəmi təhsilin qızıl dövrüdür. O dövrdə məktəb şəbəkəsi böyüdü, ucqar kəndlərdə məktəblər fəaliyyətə başladı. Ötən əsrin əvvəlində bir neçə min ali təhsilli insan var idisə, 1970-ci illərdə bu rəqəm yüz minə çatdı. Yəni Ulu Öndər Heydər Əliyevin 1970-ci illərdə ali təhsillilərin sayının artırılmasında böyük rolu var. Məhz bu dövrdə Azərbaycanda elm və təhsil sahəsində müsbət dinamikanın təməli qoyulub. Azərbaycan dilində tədris verən ümumi təhsil müəssisələrinin sayının artırılması və bu kimi irəliləyişlər məhz Ulu Öndərin adı ilə bağlıdır. 15 minə yaxın gəncin respublikadan kənarda – keçmiş SSRİ-nin nüfuzlu ali məktəblərində təhsil almasının dəstəklənməsi məhz Heydər Əliyevin respublikamıza rəhbərliyi dövründə olub".

Nazir diqqətə çatdırıb ki, azərbaycanlı tələbələrin xaricdə təhsilinə dövlət dəstəyi Prezident İlham Əliyev tərəfindən təsdiq olunmuş  Dövlət Proqramı ilə davam etdirilib. Hədəf ölkəmizdə neft kapitalını insan kapitalına çevirməkdir. 2007-2015-ci illəri əhatə edən Dövlət Proqramına əsasən 3500-ə qədər gəncimiz nüfuzlu xarici ali məktəblərdə təhsil alıb. “Prezident İlham Əliyev Ulu Öndərin əsasını qoyduğu təhsil siyasətini uğurla davam etdirir. Son illərdə Azərbaycanda 3500-ə qədər məktəb tikilib və ya əsaslı təmir olunub. Bu gün Azərbaycan məktəblərində 300 mindən artıq şagird proqramlaşdırma dərslərinə, 100 mindən artıq şagird STEAM dərslərinə cəlb olunub. Ən böyük təhsil hadisələrindən biri "Zəfər tarixi" fənninin tədrisidir. Bu fəndə Vətən müharibəsində qazanılan Qələbə, Müzəffər Ali Baş Komandanımızın rəhbərliyi ilə rəşadətli ordumuzun qəhrəmanlığı şagirdlərə aşılanır. Artıq işğaldan azad olunmuş ərazilərimizdə inşası başa çatan və istifadəyə verilmiş məktəblər var. Bir neçə məktəbin isə tikintisi başa çatmaq üzrədir. Bütün bu hadisələr Ulu Öndər Heydər Əliyevin ideyalarının təntənəsidir” ,- deyən Emin Əmrullayev qeyd edib ki, bu gün təhsilimizin təməlində azərbaycançılıq ideologiyası və  milli-mənəvi dəyərlərimiz dayanır.

Nazir diqqətə çatdırıb ki, ən mühüm hadisələrdən biri Xankəndi şəhərində Qarabağ Universitetinin təsis edilməsidir: “İnanıram ki, bu təşəbbüs və qərar istər azərbaycanlı gənclər, istərsə də təhsil işçiləri, alimlərimiz  üçün çox böyük imkanlar yaradır. Ən vacib imkan isə ondan ibarətdir ki, Qarabağ Universitetində sözün əsl mənasında təhsilə və tədrisə yenidən başlamaq imkanımız var. Birincisi, ənənələri olan Qarabağ diyarına təhsil qayıdır. İkincisi isə, orada bütün istiqamətlərin yenilənməsi, təbii ki, Azərbaycan təhsilinin inkişafına böyük imkanlar açır. Artıq gələn il sentyabrın 15-i tələbələrimizi Xankəndidə görmək istiqamətində işləyirik. Atributların, proqramların, müəllim heyətinin profilinin hazırlanması istiqamətində müəyyən işlərimiz başlayıb. Eyni zamanda, Qarabağ Universitetinin məqsədi digər universitetlərlə rəqabət yaratmaq yox, Azərbaycanın digər universitetlərini bir dəyər ətrafında birləşdirib əməkdaşlıq etmək olacaq”.

YAP İdarə Heyətinin üzvü, Azərbaycan Dövlət Neft və Sənaye Universitetinin rektor əvəzi Vazeh Əskərov çıxışında bildirib ki, Prezident İlham Əliyevin 2023-cü ili ölkəmizdə “Heydər Əliyev ili” elan etməsi xalqımız tərəfindən böyük sevinclə qarşılandı: “Başa çatmaqda olan 2023-cü ilin bu günündən dönüb geriyə baxdıqda “Heydər Əliyev ili” çərçivəsində istər ölkəmizdə, istərsə də sərhədlərimizin hüdudlarından kənarda xalqımızın Ümummilli Liderimizin xatirəsini minlərlə konfrans, forum, yarış və müsabiqələr, sərgilər və s. bu kimi tədbirlərlə minnətdarlıq hissi ilə yad etdiyinin şahidi oluruq. Cari ildə Azərbaycan Dövlət Neft və Sənaye Universitetində Ulu Öndərin 100 illiyinə həsr olunmuş 50-dək müxtəlif konfrans, forum, müsabiqə keçirilib. Onların bir qismi universitetdaxili, bir qismi beynəlxalq tərəfdaşlarımızla birgə ölkəmizin hüdudlarında kənarda təşkil olunub”.

Vazeh Əskərov deyib ki, ötən əsrin 70-ci illərindən XXI əsrin əvvəllərinədək ölkəmiz üçün taleyüklü bir dövrdə öz adını əməlləri, cəsarətli addımları və milli təfəkkürü ilə Azərbaycan tarixinə həkk etmiş Heydər Əliyevin çoxşaxəli fəaliyyəti xalqımızın taleyində əbədi iz qoyub: “Azərbaycan 1991-ci ildə dövlət müstəqilliyini bərpa etdikdən sonra ölkəmiz onu itirmək təhlükəsi qarşısında qalmışdı. Ölkədə müharibə gedirdi, “idarəçilik” isə yalnız xüsusi maraqlara xidmət edirdi və yox dərəcəsində idi, respublikada xaos, anarxiya hökm sürürdü. Milyonlarla insanın arzusu Heydər Əliyevin Bakıya dönüşü və ölkəyə rəhbərliyi idi. Yeganə nicat yolunu Ulu Öndərin qayıdışında görən Azərbaycan xalqı onu təkidlə hakimiyyətə çağırırdı. Belə bir şəraitdə “91-lər” adlanan bir qrup ziyalı, əslində, bütün xalqın iradəsini ifadə edərək Azərbaycanın müstəqillik mübarizəsinin tarixində mühüm bir addım atdı. Tarixi reallıq bundan ibarətdir ki, Heydər Əliyevin rəhbərliyi ilə yaranmış Yeni Azərbaycan Partiyası xalqın müstəqillik uğrunda apardığı mübarizənin layiqli aparıcı siyasi qüvvəsi kimi meydana çıxdı. Azərbaycan xalqının düşüncəsində əsl milli azadlıq və müstəqillik simvolu olmuş Heydər Əliyev, nəhayət, 1993-cü ilin iyununda Azərbaycan dövlətinin rəhbərliyinə qayıtdı. Həmin ilin 3 oktyabr tarixində keçirilən seçkilərdə xalqın böyük etimadı əsasında Azərbaycan Respublikasının Prezidenti seçilən Heydər Əliyev milli maraqlardan irəli gələn strateji hədəfləri uğurla reallaşdırmaqla ölkənin xilasına, rifah və tərəqqi yoluna çıxmasına, respublikamızın əsl müstəqillik qazanmasına nail oldu”.

YAP İdarə Heyətinin üzvü qeyd edib ki, Ulu Öndərin liderlik qabiliyyəti, fenomenal hafizəsi, nüfuzedici natiqlik bacarığı, dərin və ətraflı biliyi ona əsaslı qərarlar qəbul etməyə, insanların beyninə və qəlbinə asanlıqla yol tapmağa, geniş xalq kütlələri ilə istənilən səviyyədə ünsiyyət qurmağa və onları öz arxasınca aparmağa imkan verirdi: “Əsrin müqaviləsi” ilə reallaşdırılan həlledici neft strategiyası Azərbaycanın uzunmüddətli inkişafına yol açmış oldu və ölkənin siyasi, iqtisadi qüdrətini artıraraq, sonrakı illərdə onun təşəbbüsü və liderliyi ilə regionun və Avropanın enerji təhlükəsizliyini təmin edəcək neçə-neçə yeni transmilli enerji və nəqliyyat layihələrinin həyata keçirilməsinə şərait yaratdı. Bu gün Azərbaycan özünün zəngin enerji ehtiyatlarından səmərəli istifadə etməklə beynəlxalq miqyasda enerji təhlükəsizliyinin təmin edilməsində mühüm rol oynayan başlıca dövlətlərdən birinə çevrilib”.

V.Əskərov deyib ki, Ümummilli Lider özünün zəngin dövlətçilik təcrübəsinə əsaslanaraq gərgin siyasi fəaliyyəti ilə 2020-ci ildə Prezident, Müzəffər Ali Baş Komandan İlham Əliyevin rəhbərliyi ilə qazandığımız tarixi Qələbənin təməllərini yaratdı: “Bu gün xalqımız Ulu Öndər Heydər Əliyevin 100 illik yubileyini ona olan böyük sevgi və ehtiram hissi ilə yanaşı, müzəffər xalq olaraq qürur, fəxarət və Prezident İlham Əliyevə minnətdarlıq hissləri ilə qeyd edir. Uğurlu antiterror əməliyyatları sayəsində Azərbaycan Respublikasının üçrəngli bayrağı Xankəndidə dalğalanmağa başladı və müstəqillik qazandığımızdan bəri nəhayət ki, Azərbaycanın dövlət suverenliyi ölkənin bütün ərazisində təmin edildi. 44 günlük Vətən müharibəsində qazandığımız zəfər və torpaqlarımızın azad olunması Prezident İlham Əliyevin uğurlu və uzaqgörən siyasətinin real nəticəsi olmaqla yanaşı, Ulu Öndər Heydər Əliyev ideyalarının təntənəsidir”.

Vazeh Əskərov söyləyib ki, Vətən müharibəsində qazandığımız zəfər bütün dünyaya əyani olaraq bir də onu göstərdi ki, müasir, qüdrətli və qalib Azərbaycanın sağlam bünövrəsi yaradılıb,  milli ruhda tərbiyə almış, vətənpərvər gənc nəsil yetişib: “Vətənpərvər gəncliyin gerçək nümunəsi Vətən müharibəsində torpaqlarımızın azadlığı uğrunda şəhid olmuş universitetimizin tələbələridir. Hər gün minlərlə tələbə ADNSU şəhidlərinin xatirə guşəsinin önündən keçir və özünə doğma Vətənimiz üçün layiqli vətəndaş kimi yetişmək andı verir. Vətənini sevən, onun tərəqqisinə çalışan gənclik Ulu Öndərin ideyaları əsasında yetişən gənc nəsildir.  Bu gün işğaldan azad edilmiş, üçrəngli bayrağımızın qürurla və əzəmətlə dalğalandığı ərazilərdə nəhəng bərpa-quruculuq işləri görülür, Müzəffər Ali Baş Komandan İlham Əliyev ilə Birinci vitse-prezident Mehriban xanım Əliyevanın həmin torpaqlara hər bir səfəri təntənəli Zəfər yürüşünün davam etdiyini göstərir, qalib Azərbaycan Böyük Qayıdışı, dayanıqlı və layiqli məskunlaşmanı yüksək səviyyədə təmin etmək iqtidarında olduğunu bütün dünyaya nümayiş etdirir. Bütün Azərbaycan gəncliyi, yüzlərlə gənc mühəndis işğaldan azad olunmuş torpaqlarımıza həyatın yenidən qayıtması üçün çalışır”.

“Burada toplaşanların, yəqin ki, hamısı bilir – Ümummilli Lider Heydər Əliyev 1939-1941-ci illərdə o zaman Azərbaycan İndustrial İnstitutu adını daşıyan universitetimizdə təhsil alıb. Ali məktəbin 80 illik yubileyi zamanı bu zalda çıxışı zamanı Ulu Öndər bildirmişdi ki, “mənim üçün hər bir ali məktəb doğmadır və hər bir ali məktəbin öz yeri vardır. Amma, mən bu sözləri deməyə bilmirəm, indiki Neft Akademiyası (hazırkı ADNSU) vaxtilə bütün ali məktəblərə nümunə idi. Mən istərdim ki, o, bu gün də nümunə olsun”. Müasir dünyada ali təhsilin mahiyyəti, texnologiyaları dəyişib, çoxsaylı universitetlər yaradılıb, gənclərin qarşısında ölkədə, yoxsa digər dövlətlərin ali məktəblərində təhsil almaq seçimi var, rəqabət böyükdür. Son illər ərzində ölkədə təhsil sahəsində aparılan islahatlar sayəsində ali təhsil sektorunda ciddi irəliləyişlər əldə olunub. 2023-cü ildə Azərbaycan Dövlət Neft və Sənaye Universiteti ilk dəfə olaraq nüfuzlu QS agentliyinin reytinqlərində yer alıb. Biz bütün fəaliyyətimizlə çalışacağıq ki, Ümummilli Liderin söylədiyi kimi, başqalarına nümunə olan universitet  kimi inkişaf edək”,- deyə rektor əvəzi vurğulayıb.

Sonra tədbirdə Yeni Azərbaycan Partiyasının media orqanı olan Yeni TV-nin hazırladığı “Heydər Əliyev və Yeni Azərbaycan” adlı film nümayiş olunub.

Daha sonra çıxış edən YAP İdarə Heyətinin üzvü, Milli Məclisin deputatı Kamal Cəfərov ilk  olaraq “Heydər Əliyev Siyasi Məktəbi” layihəsi haqqında məlumat verib: “Layihə bizim  təşəbbüsümüz və “PAŞA Holding” MMC-nin dəstəyi ilə uğurla icra edilib. Layihənin məqsədi Sabirabad gənclərinin siyasi fəallığının artırılmasından ibarətdir. Layihə  çərçivəsində Heydər Əliyevin siyasi fəaliyyəti 6 dövr üzrə rəmzi seçilmiş məkanlarda öyrənilib. Birinci dövr Heydər Əliyevin tələbəlik və gənclik illərini əhatə edib. İkinci dövr Ulu Öndərin dövlət təhlükəsizlik orqanlarında işlədiyi dövrlə bağlı olub. Üçüncü dövr Heydər Əliyevin Sovet Azərbaycanına rəhbərlik etdiyi illəri əhatə edib. Dördüncü dövr böyük dövlət xadimi Heydər Əliyevin Kremldə çalışdığı illərlə bağlıdır. Beşinci dövr isə 1987-1993-cü illəri əhatə edib. Layihənin altıncı hissəsi 1993-2003-cü illərlə əlaqədardır. 1918-ci ilin mayında Azərbaycan istiqlal bayrağını ucaltdı, müstəqilliyini elan etdi. Bu tarixi bir hadisə idi. Bu müstəqilliyi elan edən şəxsiyyətlər intellektuallar olub. Lakin onların hamısı birlikdə Azərbaycanın istiqlalını cəmi 23 ay qoruyub saxlaya bildilər. 1993-cu ilin iyun ayında da Azərbaycan öz müstəqilliyini yenidən itirmək təhlükəsi ilə üzbəüz idi. Bu zaman xalqın tələbi ilə hakimiyyətə qayıdan Ulu Öndər Azərbaycanın istiqlal bayrağını o çətin günlərdə zirvəyə qaldırdı və müstəqilliyimizi dönməz etdi. Ona görə də Heydər Əliyevin 1993-cü ilin 15 iyun tarixində hakimiyyətə qayıdışı xalqımızın qurtuluşudur”.

YAP İdarə Heyətinin üzvü qeyd edib ki, Heydər Əliyev Azərbaycanın inkişaf yolunu, xarici siyasətini, ordu quruculuğu strategiyasını müəyyən etdi: “Ulu Öndərin ən böyük xidmətlərindən biri isə əsasını qoyduğu müstəqil Azərbaycanın uğurlu inkişafının davamlılığını təmin etmək, gələcək siyasi varisini hazırlamaq idi. Məhz Heydər Əliyevin siyasi varisi, Prezident, Ali Baş Komandan İlham Əliyevin rəhbərliyi ilə ərazi bütövlüyümüz, suverenliyimiz bərpa olundu, Azərbaycan bütövləşdi. Bütün bunlardan çıxarmalı olduğumuz nəticə odur ki, Azərbaycanın rifahı həmişə Heydər Əliyev irsi ilə bağlı olub. Bu irs bizim milli sərvətimizdir, gücümüzdür. Məhz bu irslə, Azərbaycanın müstəqilliyinin və rifahının qarantı İlham Əliyevlə Zəfər seçkisindən sonra da əmin addımlarla həmişə irəliləyəcəyik”.

YAP Veteranlar Şurasının üzvü Əli Həsənov çıxışında bildirib ki, Heydər Əliyev həm SSRİ dövründə, həm də müstəqillik illərində respublikamıza rəhbərlik etdiyi zaman müstəsna fəaliyyət göstərib, misilsiz işlər görüb: “Heydər Əliyevdə fitri istedad, bacarıq və cəsarət, Vətəninə, xalqına, torpağına bağlılıq var idi. Yəni idarəçilik üçün nə tələb olunurdusa, hamısı var idi.  Ulu Öndər 1969-cu ilin iyul ayında Azərbaycanın rəhbəri seçildikdən sonra qısa müddət ərzində respublikamızı ittifaq miqyasında ön sıralara çıxardı. Həmin dövrdə Azərbaycan hər bir sahədə böyük nailiyyətlərə imza atdı. Heydər Əliyevin 1969-1982-ci illərdəki idarəçilik sistemi o vaxtkı SSRİ-nin bütün rəhbərlərinə nümunə idi. Daha sonra Ulu Öndər Heydər Əliyev SSRİ-də yüksək vəzifəyə irəli çəkildi və Onun nəzarətində olan hər bir sahədə tərəqqi baş verdi. Moskvada işlədiyi zaman Heydər Əliyev ittifaq respublikalarının inkişafında da böyük xidmətlər göstərdi”.

YAP Veteranlar Şurasının üzvü qeyd edib ki, 1990-cı illərin əvvəlində respublikada iqtisadi, siyasi xaosun hökm sürdüyü, ölkənin dünya xəritəsindən silinmək təhlükəsinin olduğu dövrdə xalqımızı yalnız Heydər Əliyev kimi şəxsiyyət xilas edə bilərdi: “Təcrübə, bilik, bacarıq, cəsarət, xalqın Ona olan inamı, ölkədəki iqtisadi, siyasi, sosial durumdan xəbərdar olması və xalqının psixologiyasına bələdçiliyi imkan verdi ki, ölkəni xilas etsin. Xalqın tələbi ilə hakimiyyətə yenidən qayıtdıqdan sonra ictimai-siyasi sabitliyi bərpa etdi, milli inkişaf strategiyasını müəyyənləşdirdi, bazar iqtisadiyyatına keçidə başladı, idarəetmənin qanunvericilik bazasını yaratdı, inzibati strukturu yenidən qurdu, vətəndaş həmrəyliyinə nail oldu, çoxpartiyalı siyasi sistemə keçidi təmin etdi. Eyni zamanda, Heydər Əliyev müstəqil Azərbaycanı bütün dünyada tanıtdı, ölkənin beynəlxalq birliyə inteqrasiya olunmasında vacib addımlar atdı. “Əsrin müqaviləsi” kimi mühüm sənədin imzalanmasında da Heydər Əliyevin beynəlxalq müstəvidəki nüfuzu müstəsna rol oynadı”.

Əli Həsənov deyib ki, Ulu Öndər Heydər Əliyevin güclü iqtisadiyyat və güclü ordu quruculuğu istiqamətində həyata keçirdiyi siyasət Azərbaycanın işğal altında olan torpaqlarının azad olunmasına hesablanmışdı və belə də oldu: “Bu gün Prezident İlham Əliyev Ulu Öndərin siyasətini ölkənin, xalqın mənafeyi naminə uğurla davam etdirir. Azərbaycan dövlətinin öz torpaqlarını işğaldan azad etməsi, ərazi bütövlüyümüzün və suverenliyimizin bərpa olunması Heydər Əliyev siyasətinin və Prezident İlham Əliyevin iradəsinin təntənəsidir”.

Çıxış edən “Heydər Əliyev  siyasi məktəbi”  layihəsinin iştirakçısı Nuranə Hüseynzadə bildirib: “Ulu Öndər Heydər Əliyevin 100-illiyinə həsr edilmiş Heydər Əliyev siyasi məktəbi layihəsinin iştirakçısıyam. Belə bir layihənin keçiriləcəyini öyrənəndə çox böyük həvəslə layihənin iştirakçısı olmaq istədim. Çünki bir şəhid bacısı kimi hesab edirəm ki, Heydər Əliyevin həyatını, siyasi irsini öyrənmək mənim mənəvi borcumdur. Layihə ərzində Ulu Öndərin gənclik illəri ilə bağlı Naxçıvandakı görüşlərimizdən başlayaraq, bu günə kimi Heydər Əliyevin həyatının hər dövrünü öyrəndik, Ulu Öndəri şəxsən tanımış, hətta onun rəhbərliyi altında işləmiş şəxslərlə görüşlərimiz keçirildi. Həm mənim, həm də digər layihə iştirakçıları üçün böyük şərəfdir ki, biz belə bir dahi insanın həyat yolunu ziyalıların sözlərindən öyrənə bilirik. Layihədən əvvəl də, əlbəttə ki, biz Ulu Öndər haqqında kitablar, məqalələr oxuyurduq, videofilmlər izləyirdik, valideynlərimiz bizə onun haqqında danışırdı. Lakin bu layihə sayəsində tarixi incəliklərlə öyrənmək şansımız oldu. Biz gənclər, şəhid ailələri, həmişə Heydər Əliyev irsinin ətrafında sıx birləşmişik, bundan sonra da bu prinsipial yolla getməyə davam edəcəyik”.

Tədbirin rəsmi hissəsi Yeni Azərbaycan Partiyasının Himninin  səsləndirilməsi ilə başa çatıb.

Sonda Azərbaycan Dövlət Neft və Sənaye Universitetinin tələbələrinin ifasında bədii hissə təqdim olunub.

• 
• 
• 
• 
• 
• 
• 
• 
• 
• 
• 
•