«Xocalıya Ədalət»-in Kolumbiya presedenti

Azər Həsrət: «Kolumbiya BMT üzvüdür, eyni zamanda Güney Amerika Xalqları Birliyi, Sakit Okean Alyansı kimi təşkilatlarda söz sahibidir»

Vazeh Əsgərov: «Kolumbiya 24 aprel 2012 ildə Xocalı soyqırımını rəsmən tanımış digər 6 respublika sırasındadır»

Elçin Xalidbəyli: «Bu, Xocalı soyqırımının daha çox xarici dövlət tərəfindən tanınmasına stimul verəcək»

Kolumbiya Respublikası Konqresinin Nümayəndələr Palatasının Xarici İşlər və Milli Müdafiə Məsələləri Üzrə 2-ci Komitəsi Ermənistan-Azərbaycan münaqişəsi və Xocalı soyqırımına dair qərar qəbul edib. Kolumbiya Konqresinin Nümayəndələr Palatasının sədri Hernan Penaqos Xiraldo tərəfindən irəli sürülən «Ermənistan-Azərbaycan münaqişəsi» adlı qərar layihəsi Palatanın 2-ci Komitəsində səsverməyə qoyulub və yekdilliklə qəbul edilib.

Sözügedən sənəd Azərbaycanın Dağlıq Qarabağ regionu və onun ətrafındakı yeddi rayonun Ermənistan tərəfindən işğal olunması, bu hərbi işğal nəticəsində Azərbaycan əhalisinə qarşı törədilmiş cinayətlər, o cümlədən dinc əhalinin öldürülməsi və əlil edilməsi, Azərbaycan vətəndaşlarının hüquqlarının pozulması, xüsusilə Xocalıda baş vermiş soyqırım aktı və tərəflər arasında bərqərar edilmiş atəşkəs rejimin pozulması qətiyyətlə pislənilib.

Qərarda həmçinin, Azərbaycan və Ermənistanın beynəlxalq miqyasda tanınmış sərhədlərinə hörmət prinsiplərini rəhbər tutaraq, Birləşmiş Millətlər Təşkilatının Təhlükəsizlik Şurasının 822, 853, 874 və 884 saylı qətnamələrinin yerinə yetirilməsi barədə Ermənistan hökumətinə çağırış ifadə edilib. Hernan Penaqos Xiraldo tərəfindən komitə üzvləri üçün hazırlanan altı səhifəlik icmalda Dağlıq Qarabağ münaqişəsi, eləcə də Azərbaycan torpaqlarının 20 faizinin Ermənistan tərəfindən işğal edilməsi və bu işğalın regionda sülhə və əmin-amanlığa təhdid olması, rəsmi Yerevanın təcavüzkar siyasəti nəticəsində bir milyondan artıq azərbaycanlının öz yurdlarından qaçqın və məcburi köçkün düşməsi barədə ətraflı məlumat verilib və pislənilib.

İcmalda münaqişənin tarixinə nəzər salınır və Ermənistan silahlı qüvvələrinin Azərbaycanın Xocalı şəhərində törətdiyi soyqırımın ağır nəticələri barədə məlumat verilir. İcmalın sonunda Hernan Penaqos Xiraldo Azərbaycanın Dağlıq Qarabağ regionunun və ətraf rayonlarının Ermənistan tərəfindən işğalının xronologiyasını verir və adıçəkilən işğalın qarşısının alınması və Ermənistan silahlı qüvvələrinin Azərbaycan ərazilərindən dərhal və qeyd-şərtsiz çıxarılmasını tələb edən BMT Təhlükəsizlik Şurasının qəbul etdiyi dörd qətnamə barədə faktları diqqətə çatdırır.

Bu qərar Xocalı soyqırımının tanıdılması prosesinə necə təsir edə bilər?

Politoloq Elnur Eltürk bildirdi ki, ümumiyyətlə, son illər Xocalı soyqırımının Meksika, Pakistan senatında tanınmasını bu istiqamətdə gedən uğurlu işlərin nəticəsi hesab etmək olar. Onun sözlərinə görə, bu nəticəni Azərbaycan tərəfinin yürütdüyü düzgün təbliğatın nəticəsi kimi dəyərləndirməliyik: «Həmçinin, Heydər Əliyev Fondu tərəfindən aparılan Xocalıya Ədalət kampaniyası bu prosesə öz müsbət töhfəsini verir. Azərbaycan dövlətinin son illər Latın Amerikası ölkələri ilə əlaqələrinə xüsusi önəm verməsi və orada səfirliklərimizin fəaliyyət göstərməsi, qarşılıqlı səfərlərin təşkili rəsmi Bakının bu regionla bağlı daha fəal siyasət yürüdəcəyini göstərir. Hesab edirəm ki, Kolumbiya parlamentində Xocalı soyqırımının tanınması, başqa dövlətlər üçün presedent ola bilər. Bu eyni zamanda erməni diasporunun yüz ildir ki, qondarma soyqırımla bağlı apardığı təbliğata qarşı böyük zərbədir. Artıq, dünya birliyi gerçəklikləri görməyə başlayıb. Bu işləri davam etdirilməli və Ermənistanın iç üzü açılıb ortaya qoyulmalıdır».

Siyasi şərhçi Azər Həsrət bildirdi ki, istənilən ölkənin, hətta adi bir əyalətin belə Azərbaycan həqiqətlərini rəsmən tanıması, Xocalı kimi bir soyqırımına hüquqi qiymət verməsi ölkəmizin xeyrinədir: «Bu baxımdan Kolumbiyanın bu aktını çox önəmli addım hesab edirəm. Düzdür, kimsə düşünə bilər ki, Kolumbiya dünya siyasi səhnəsində elə də ciddi rolu olmayan bir ölkədir və qəbul etdiyi qərar çox da işə yaramaya bilər. Ancaq nəzərə almaq lazımdır ki, Kolumbiya da BMT üzvüdür, eyni zamanda Güney Amerika ölkələri arasında özünəməxsus yeri var, üstəlik də Güney Amerika Xalqları Birliyi, Xalqların And Birliyi, Sakit Okean Alyansı kimi təşkilatlarda söz sahibidir. Yəni Kolumbiya bizim düşündüyümüz qədər də önəmsiz bir ölkə deyil, əksinə, Güney Amerikada söz sahibi sayıla biləcək ölkələr sırasındadır. Bu baxımdan həmin ölkənin Xocalı soyqırımını tanıması ona qonşu və yaxın olan ölkələrə də təsir göstərə bilər».

Strasburq Universitetinin doktoru Vazeh Əsgərov vurğuladı ki, bu qərar Azərbaycan dövlətinin və diasporunun uzun illər boyu ədalətin bərqərar olması yolunda apardıqları işin nəticəsidir. Onun sözlərinə görə, 1992-ci il fervalın 26-da Azərbaycan xalqına qarşı törədilən Xocalı soyqırımı ölkəmizin tarixinə ən dəhşətli və faciəli səhifələrdən biri kimi daxil olub: «Bu 20 ildə Xocalı qaçqınlarının simasında özünü azərbaycanlı sayan bütün soydaşlarımız bu haqsızlığın tanınması istiqamətində fəaliyyət göstərmiş və BMT, Avropa İttifaqı və Avropa Təhlükəsizlik və Əməkdaşlıq Təşkilatlarına müraciətlər ünvanlamış, erməni hərbi təcavüzü nəticəsində başımıza gələn bəlaya laqeyd qalmamaqlarını dilə gətirmişlər. Onu da qeyd edim ki, beynəlxalq konvensiyalar və ümumbəşəri qanunlar Xocalı faciəsi kimi soyqırımları pisləyir, yolverilməz olduğunu bildirir və Azərbaycan BMT-nin 1948-ci il 9 dekabr tarixli «Soyqırım cinayətinin qarşısının alınması və ona görə cəzalar haqqında» konvensiyasını rəhbər tutaraq, Ermənistan Respublikasına qarşı BMT-nin Beynəlxalq məhkəməsində iddia qaldırmaq üçün bütün hüquqi əsaslara malikdir».

O, həmçinin əlavə etdi ki, iyulunun 30-da Kolumbiya Respublikası Konqresinin Nümayəndələr Palatasının Xarici İşlər və Milli Müdafiə Məsələləri Üzrə 2-ci Komitəsinin qərarı təqdirəlayiqdir: «Qeyd edək ki, Kolumbiya parlamenti 24 aprel 2012 ildə Xocalı soyqırımını rəsmən tanımış digər 6 respublika sırasındadır. Sözügedən sənəd Ermənistan tərəfindən Dağlıq Qarabağ regionunu və onun ətrafındakı yeddi rayonun işğal olunmasını, Azərbaycan əhalisinə qarşı törədilmiş cinayətlər, o cümlədən dinc əhalinin öldürülməsi və əlil edilməsi, soyqırım aktı və tərəflər arasında bərqərar edilmiş atəşkəs rejimin pozulması qətiyyətlə pisləyir və BMT Təhlükəsizlik Şurasının qəbul etdiyi dörd qətnamə barədə faktları diqqətə çatdırır. Əminəm ki, yaxın gələcəkdə Azərbaycan həqiqətlərinin, haqq səsinin dünya ictimaiyyətinə çatdırılmasında görülən işlər daha da geniş vüsət alacaq, bu səpkidə veriləcək qərarlar öz torpaqlarını itirmiş on minlərlə soydaşımızın yenidən öz yurdlarına dönməyinə yol açacaq».

Siyasi şərhçi Elçin Xalidbəyli isə diqqətə çatdırdı ki, bu, ölkəmiz üçün olduqca əhəmiyyətli bir hadisədir: «Çünki həmin qərar eynilə Azərbaycanın maraqlarına, mövqeyinə uyğun gəlir. Ən əsasısa bu qərar beynəlxaıq hüquq normalarını da özündə tamamilə əks etdirir. Təbii ki, hər hansı xarici ölkədə belə bir qərarın qəbul edilməsi Azərbaycanın xarici siyasət idarəsinin aktivinə yazılmalıdır. Çünki belə sənədlər təsadüfən qəbul edilmir. Şübhəsiz ki, bu tipli qərarların qəbulu üçün Dağlıq Qarabağ münaqişəni xarici dövlətlərin rəsmi dairələrinə fundamental şəkildə izah etmək, problemin mahiyyətini incəliklərinə qədər açmaq lazımdır. Deməli, Azərbaycanın lobbiçilik fəaliyyəti bu önəmli işin öhdəsindən gəlinməsi üçün yetərli olub. Və Kolumbiya parlamentində qəbul edilmiş bu qərarı Azərbaycan diplomatiyasının uğuru hesab etmək mümkündür. Heç şübhəsiz ki, bu cür qərarlar Xocalı soyqırımının bütün dünyada tanıdılması prosesinə böyük töhfələr verə bilər. Çünki Kolumbiya Dağlıq Qarabağ münaqişəsində maraqlı tərəflərdən deyil, üstəlik, Cənubi Qafqaz regionuyla yaxından-uzaqdan heç bir əlaqəsi yoxdur. Ancaq bu dövlətin qəbul etdiyi Xacalı qərarı bütün dünyaya kimi haqlı, kimin haqsız olduğunu birmənalı şəkildə göstərir. Digər dövlətlər üçün də örnək rolunu oynayır. Üstəlik, qondarma «erməni soyqırımı»nı tanımış bəzi dövlətləri də çətin vəziyyətə salır. Yəni əslində əsl təcavüzkarın və soyqırım törədənin, işğalçının məhz ermənilər olduğunu göstərir. Bu baxımdan, belə qərarların erməni diasporinin qondarma «erməni soyqırımı» ilə bağlı sərsəmləmələrin təbliği prosesini də əhəmiyyətdən salır. Xatırladaq ki, Xacalı soyqırımını indiyə qədər Kolumbiyadan başqa, Pakistan, Meksika və ABŞ-ın bir sıra ştatlarının parlamentlərində tanıyıblar. Və bu, güclü erməni diasporu qarşısında qazanılmış kifayət qədər ciddi uğurlardandır. Bu baxımdan, hesab etmək olar ki, Xocalı soyqırımının beynəlxalq aləmdə tanıdılması prosesi bundan sonra da uğurla davam etdiriləcək. Və Kolumbiya parlamentində qəbul edilmiş qərar da Dağlıq Qarabağ münaqişəsinin ədalətli həllinə, eləcə də Xocalı soyqırımının daha çox xarici dövlət tərəfindən tanınmasına stimul verəcək».

«Olaylar» İnformasiya Agentliyinin siyasi şərhçisi Elman Cəfərli dedi ki, Kolumbiya senatının çıxardığı Azərbaycan ərazilərinin işğalı ilə bağlı qərar təqdirəlayiqdir. Onun sözlərinə görə, qərarda əlavədə Azərbaycana qarşı təcavüzkar siyasətin tarixi haqqında məlumat verilib, Azərbaycanın mövqeyi əks olunub, o cümlədən Azərbaycanın Dağlıq Qarabağ regionu və onun ətrafındakı digər 7 rayonun Ermənistan tərəfindən təcavüzə məruz qaldığı və indi qədər Ermənistan silahlı qüvvələri tərəfindən işğal altında saxlanması əks olunub: «Bundan öncə Meksika parlamenti də analoji qərar çıxarmışdı. Xocalı soyqırımına dair Azərbaycanın xeyrinə qərarlar Serbiya və ABŞ-ın Arkanzas ştatının qanunverici orqanlarında da çıxarılıb. Bütün bunlar Azərbaycan dövlətinin Qarabağ diplomatiyasının uğuru kimi qiymətləndirilməlidir. Dünya azərbaycanlılarının qurultayında Azərbaycan prezidenti İlham Əliyev «müdafiədən hücum diplomatiyasına keçməliyik» bəyanatını vermişdi. Bu bəyanatdan sonra ölkənin xarici siyasət idarəsi və diaspora təşkilatlarımız fəallığı artırırdı. Artıq nəticə və uğurlarımız var. Hesab edirəm ki, Kolumbiya parlamentinin bu qərarı «güclü və məğlubedilməz erməni diasporası» mifini bir daha dağıtdı. Azərbaycan iqtisadi və hərbi cəhətdən Xocalı soyqırımını törətmiş işğalçı Ermənistndan güclüdür. Xocalı soyqırımını tanıtma kampaniyasında qazandığımız nəticələr onu göstərir ki, yaxın zamanlarda diaspora və lobbiçilik sahəsində də üstünlük bizim tərəfimizdə olacaq. Dünya ictimai rəyini tam olaraq öz xeyrimizə dəyişə biləcəyik.

Əli

http://www.xalqcebhesi.az/?p=126937

Təhsildə seçim problemi

«Testlə universitetlərə qəbul ola bilməyən gənclərə şəraitin yaradılması daha düzgün olar»

Vüqar Zifəroğlu: «O zaman xaricə sırf ali məktəbə qəbul olmaması səbəbi ilə oxumağa üz tutan tələbələr burada təhsil alardılar»

Həsir Əhmədli: «Təhsil sistemi kökündən dəyişməlidir»

Vazeh Əsgərov: «İşləyib öz xərclərinin ödəməsi məsələsi əlbətdəki gənclərimizin daha çox xarici ölkələrə üz tutmaqları ilə müşahidə olunur»

Bu gün yüzlərlə gənc istər dövlət xətti, istərsə də öz təşəbbüsləri ilə xaricdə təhsil almağa çalışırlar.

Azərbaycan gənclərinin xarici ölkələrə, xüsusən də MDB respublikalarına ödənişli təhsil almaq üçün açın etməsinin səbəbi nədir? Testlə universitetlərə qəbul oluna bilməyən gənclərə öz vətənlərində ödənişli əsaslarla təhsil almalarına şərait yaratmaq daha doğru olmazdımı?

Bakı Dövlət Universitetinin müəllimi Vüqar Zifəroğlu «əlbəttə, şəraitin yaradılması daha düzgün olardı»,- deyə bildirib: «O zaman xaricə sırf ali məktəbə qəbul olmaması səbəbi ilə oxumağa üz tutan tələbələr burada təhsil alardılar. Amma o da var ki, bəzən abituriyentlər öz təhsillərini könüllü şəkildə xaricdə davam etmək istəyirlər. Bu da normal haldır. Xarici ölkələrdə təhsil alan gənclərimiz nə qədər çox olsa, nəticədə bundan cəmiyyətimiz xeyir götürər».

Bakı Dövlət Universitetinin müəllimi Nəsir Əhmədli vurğuladı ki, Azərbaycanın orta məktəblərində tədris istənilən səviyyədə deyil: «Maaş çox aşağı olduğundan müəllimlər dərsə can yandırmırlar. Valideynlərin çoxunun repetitor tutmaq imkanı yoxdur. Buna görə də savadsızlıq baş alıb gedir. Buna baxmayaraq, hamı ali təhsil diplomu almaq istəyir. Diplom oğlanlara əsgərlikdə 6 ay az xidmət etmək üçün, qızlara isə cehiz kimi lazımdır. Buna görə də test üsulu ilə Azərbaycann ali məktəblərinə qəbul oluna bilməyən gənclər MDB ölkələrinə üz tuturlar. Orada bəzi ali məktəblərə qəbul imtahansızdır. Testlə universitetlərə qəbul ola bilməyən gənclərə öz vətənlərində ödənişli əsaslarla təhsil almalarına şərait yaradılarsa, vəziyyət kütləvi olaraq pisləşər, rüşvət və savadsızlıq daha geniş miqyas alar. Təhsil sistemi kökündən dəyişməlidir».

Strasburq Universitetinin doktoru Vazeh Əsgərov isə diqqətə çatdırdı ki, XIX əsr insanının ali təhsil almaq arzusu çox əhəmiyyətli bir məsələyə çevrilməkdədir: «Azərbaycanda da bu tendensiya getdikcə artmaqdadır. Lakin qeyd etməliyəm ki, ali məktəblərə üz tutan tələbələrin bir qismi sadəcə diplom əldə etmək, digərləri isə tək diplom deyil, eləcə də savad əldə etməyi qarşılarına məqsəd qoyurlar. Məqsədyönlü surətdə təhsil almağı düşünən tələbə öz universitet, ixtisas seçimini və eləcə də gələcəkdə hansı peşə seçim etmək perspektivlərini əvvəlcədən nəzərdən keçirir. Bu qrupa daxil olan insanlar eyni zamanda öz təhsillərini xarici ölkələrdə də davam etdirmək arzusunda olurlar. Qeyd etmək yerinə düşər ki, 5-7 il bundan öncəyə qədər Azərbaycandakı bazar qiymətləri eləcə də həyat səviyyəsi Avropa və digər qərb ölkələrindən kifayət qədər fərqlənirdi. Bu günün Azərbaycan tələbəsi aylıq xərclərini və ödənişli oxuduğu ali məktəbin qiymətlərini nəzərdən keçirəndə bir o qədər də fərq olmadığının şahidi olur və təhsil üçün bir başa xarici universitetlərə üz tuturlar. Məsələn Fransa və Almaniyada dövlət universitetlərində təhsil bəzi adminstrativ xərcləri (təx. illik 350-500 avro) çıxmaq şərti ilə pulsuzdur. Tələbənin yalnız aylıq yataqxana və yemək xərclərini (təx. bir ay üçün minimum 650 avro) hesablayanda təhsilinı Avropa ölkələrində almaq arzusunun nə dərəcədə real olması üzə çıxır. Və ən nəhayət əksər Avropa ölkələrində universitetə daxil olmaq üçün əlavə imtahan vermək də tələb olunmur. Tələbələrin bir çox üstünlüklərinin, məsələn, dərs qrafiklərinin seçimində nisbi azadlıqlarının olması və eləcə də işləyib öz xərclərini ödəmək imkanlarının olması gənclərimizin daha çox xarici ölkələrə üz tutmaqları ilə müşahidə olunur».

Keçmiş təhsil naziri Firudin Cəlilov isə  hesab edir ki, təhsil ümumiyyətlə pulsuz olmalıdır: «Hazırda Azərbaycan dövlətinin maliyyə imkanları heç də başqa ölkələrdən geri qalmır. Rəsmi statistik məlumatlar da göstərir ki, ölkəmizin iqtisadi qüdrəti gündən-günə genişlənir. Sözsüz ki, belə bir şəraitdə Azərbaycanın ali təhsil müəssisələrində də təhsilin pulsuz olması mümkündür».

Firudin Cəlilov onu da vurğulayır ki, bu addım ölkədə daha çox gəncin ali təhsil almasına imkan yarada bilər: «Düzdür, bizdə icbari təhsil pulsuzdur və bu təhsil pilləsində dövlət bütün xərcləri öz üzərinə götürüb. Çünki bütövlükdə təhsil pulsuz ola bilməz. Burada əsas məsələ göstərilən xidmətin müqabilində yaranan xərcləri hansı tərəfin ödəyəcəyidir. Məlumdur ki, son illər ali məktəblərə qəbul planında ödənişli ixtisasların sayı ödənişsiz ixtisasların sayını üstələyir. Eyni zamanda, ödənişli ixtisaslarda təhsil haqqının məbləğində sürətli artım müşahidə edilir. Bu tendensiya isə həm valideynləri, həm də abituriyentləri çətin duruma salıb. Çünki övladı ödənişli əsaslarla ali məktəbə daxil olan bəzi valideynlər təhsil haqqı yüksək olduğundan öz uşaqlarını ali məktəbə göndərə bilmirlər. Bu da nəticə etibarilə aztəminatlı ailələrdən olan gənclərin təhsil hüququnun pozulması ilə nəticələnir». Keçmiş təhsil naziri həmçinin bildirir ki, son illər təhsil sahəsində əhəmiyyətli qanunların qüvvəyə minməsinə baxmayaraq bəzən bu qanunlar sənəd üzərində qalır: «Məsələn, Azərbaycanda müvafiq dövlət proqramına əsasən, gənclərimizin nüfuzlu xarici universitetlərdə təhsil alması üçün şərait yaradılıb. Bu özlüyündə gözəl bir təşəbbüsdür və dövlət istedadlı gənclərin təhsil xərclərini üzərinə götürməklə insan kapitalına yatırım etməyə çalışır. Amma bu ölkəyə daxil olan vəsaitlərin müqabilində çox kiçik addımdır. Biz dünya ölkələri ilə ayaqlaşmaq istəyiriksə insan kapitalına investisiyanı artırmalıyıq».

Azərbaycan Təhsil Şurasının sədri Əjdər Ağayev də hesab edir ki, Azərbaycanda belə bir təcrübənin tətbiqi xüsusilə aztəminatlı ailələrdən olan gənclərin təhsil almaq imkanlarını genişləndirə bilər: «Azərbaycanda ödənişsiz təhsilin ilbəil azaldılması xüsusilə 300-dən aşağı bal toplayan gənclərin pulsuz təhsil almaq imkanını məhdudlaşdırır. Çünki ödənişsiz ixtisaslarda təhsil almaq istəyənlər minimum 300 bal toplamalıdırlar. Əks təqdirdə, onlar yalnız ödənişli ixtisaslarda oxuya bilərlər. Pullu ixtisaslarda təhsil almağa isə hər bir gəncin imkanı çatmır. Bəzən maddi imkansızlıq onları qəbul olduqları ixtisaslardan imtina etməyə gətirib çıxarır. Nəticədə 200 balla hansısa imkanlı şəxsin uşağı ali təhsil ala bilir, amma 300 bal toplayan imkansız gənc təhsildən kənarda qalır. Bu baxımdan Türkiyə təcrübəsinin Azərbaycanda tətbiqi belə gənclər üçün geniş imkanlar aça bilər». Türkiyə təcrübəsinin Azərbaycanda tətbiq ediləcəyi təqdirdə, ali məktəblərin maliyyələşməsi məsələsinə toxunan mütəxəssis bildirir ki, bu məsələdə dövlətlə bərabər universitetlər eyni yükü daşımalıdır: «Sözsüz ki, hökumət həm dövlət, həm də özəl ali məktəblərə müəyyən maddi dəstək verməlidir. Amma universitetlər özləri də maliyyə resurslarının tapılmasında maraqlı olmalıdırlar. Məsələn, Avropada fəaliyyət göstərən universitetlərin elm adamları müxtəlif beynəlxalq təhsil layihələrinə qatılmaqla böyük məbləğdə qrantlar udurlar. Müvafiq şərtlərə əsasən, həmin məbləğin 20 faizi müəllifə, 80 faizi isə çalışdığı ali məktəbə çatır. Yəni, təhsil pulsuz olsa da, ali məktəblər dövlətdən asılı olmur. Onlar qazandıqları maliyyə resursları hesabına büdcələrini formalaşdıra bilirlər. Düşünürəm ki, əgər bu təcrübədən Azərbaycanda da istifadə olunarsa, ali məktəblər heç bir maliyyə çətinliyi yaşaya bilməz. Bir sözlə, hökumət ümumxalq mənafeyi naminə bu addımı atmalıdır».

Əli 

http://www.xalqcebhesi.az/?p=135430

Vazeh Əsgərov: “Azərbaycan xalqı fəxr edir ki…”

Tariximizə 20 Yanvar kimi bir şanlı gün əlavə olundu

   “XX əsrin sonu Dünyada baş verən iki mühüm hadisə, 1989-cu ildə Berlin divarının aşırılması və 1991-ci ildə SSR-in süqut etməsi bir çox dəyişikliklərə gətirib çıxardı. Belə ki, yenidənqurma siyasəti və aşkarlıq adı altında yürüdülən siyasət müxtəlif nəticələrə o cümlədən SSR-nin münaqişə zonalarından (Əfqanıstan, Afrika) eləcə də Almaniyadan qoşunlarının çıxarılması ilə nəticələndi”.

   BayMedia-ya açıqlamasında belə deyən Strasburq Universitetinin doktoru Vazeh Əsgərov bildiirb ki, bu dövrdə sovetlər birliyinin dağılması prosesi daha da surətləndi və keçmiş birliyə aid olan xalqlar arasında münaqişələr alovlanmağa başladı: “Bu proses Avropa olkələrinin (Yuqoslaviya, Çexoslovakiya) parçalanması, yeni yaranan münaqişə ocaqlarının ( Balkan və Qarabağ) alovlanması eləcə də ölkələrin ard-arda öz müstəqilliklərini elan etməsi ilə nəticələndi. Azərbaycan öz müstəqilliyini 1991-ci ilin oktyabrında qazandı. Lakin bu müstəqillik digər SSR-i xalqları kimi asan başa gəlmədi. Tariximizə 20 Yanvar kimi bir şanlı gün əlavə olundu. Son illərə qədər biz bu günü kədər və qüssə ilə qeyd etdik. Bu illər ərzində sovet əsgərinin sovet vətəndaşına necə güllə aça biləcək iqtidarında ola biləcəyini anlamağa çalışdıq. Həmin günün tarixini yaşayan eləcə də bu günki nəsil Azərbaycan xalqı fəxr edir ki, 20 Yanvarda öz həyatlarını Azərbaycanın müstəqilliyi uğrunda şəhid etmiş övladları olub. Bu gün Azərbaycan xalqının tarixində müstəqillik uğrunda qazandığı şanlı bir gündür”.

Əli

16 Yanvar 13:04

http://baymedia.az/news.php?id=31515#.UtfDohC1ZvC

Vazeh Əsgərov: “Bunu Azərbaycanın xarici siyasətinin ən böyük tarixi uğurlarından biri kimi qəbul etmək olar”

“Azərbaycanın BMT-nin Təhlükəsizlik Şurasındakı qeyri daimi üzv kimi ikiillik fəaliyyəti ölkəmiz üçün təcrübə baxımından çox önəmli oldu”

BayMediaya açıqlamasında belə deyən Strasburq Universitetinin doktoru Vazeh Əsgərov bildirib ki, eyni zamanda Azərbaycanın fəal üzv kimi beynəlxalq ictimaiyyətə özünü təqdim edilməsinə böyük bir şans verdi: “Bunu Azərbaycanın xarici siyasətinin ən böyük tarixi uğurlarından biri kimi də qəbul etmək olar. 193 mümkün səsdən 155-ni qazanan Azərbaycan beynəlxalq ictimaiyyətin ölkəmizə olan etimadının göstəricisi idi. Eyni zamanda Azərbaycan bu iki il ərzində iki dəfə BMT TŞ-da sədrlik vəzifəsini də həyata keçirib və bu müddət ərəfəsində Azərbaycanın təşəbbüsü ilə ilk dəfə olaraq BMT ilə İslam Əməkdaşlığı Təşkilatının bir neçə yüksək səviyyəli görüşləri təşkil olunub. Qeyd etmək lazımdır ki, Azərbaycan bu iki il ərzində BMT Təhlükəsizlik Şurasının üzvü kimi xüsusilə humanitar məsələlərə önəm verən bir ölkə və etibarlı bir tərəfdaş olduğunu göstərdi. Bura eyni zamanda Ermənistan-Azərbaycan Dağlıq Qarabağ münaqişəsinin Azərbaycan üçün nə qədər önəmli olması və Azərbaycanın sülhsevər bir xalq kimi dünya ictimaiyyətinə bu problemin məhz beynəlxalq hüquq prinsipləri çərçivəsində həll olunmasının vacibliyini də göstərmək olar. Əminəm ki, bu hələ başlanğıcdır və Azərbaycanın BMT –nin Təhlükəsizlik Şurasında qazanılmış uğurlu təcrübəsi ölkəmizin bundan sonra da beynəlxalq müstəvidə oz milli maraqlarının təmin olunmasına yol açacaq”.

VAZEH

http://baymedia.az/news.php?id=30945#.Us1t1PQW12n