2018/2019-cu tədris ilində UFAZ-ın yeni laboratoriyaları istifadəyə veriləcək.

2018/2019-cu tədris ilindən etibarən Azərbaycan Dövlət Neft və Sənaye Universitetinin (ADNSU) ikinci tədris binasında yerləşən 2500 kv/m-lik ərazidə ADNSU-nun nəzdində fəaliyyət göstərən Azərbaycan-Fransız Universitetinin (UFAZ) kimya, fizika və kompüter elmləri ixtisasları üzrə təhsil alan tələbələri üçün tədris laboratoriyalarının istifadəyə verilməsi nəzərdə tutulub. Bu haqda UFAZ-ın icraçı direktoru, dosent Vazeh Əsgərov məlumat verib.

“2016-cı ilin sonundan etibarən laboratoriyaların tikilməsinə və əsaslı təmir olunmasına başlanılıb. Artıq işlər yekunlaşmaq üzrədir və 2018/2019-cu tədris ilindən kimya, fizika, geofizika və kompüter elmləri ixtisasları üzrə laboratoriyalar istifadəyə veriləcək”, - deyə Vazeh Əsgərov bildirib.

UFAZ-ın icraçı direktoru qeyd edib ki, “laboratoriyalara avadanlıqların alınması və quraşdırılması tamamilə Strasburq Universitetinin standartları əsasında aparılır. Belə ki, istər binanın tikilişi, istərsə də laboratoriyalarda avadanlıqların quraşdırılmasına Strasburq Universitetindən gəlmiş mütəxəssislər nəzarət edir”.

Qeyd edək ki, hazırda UFAZ-ın tədris binasında 1-ci və 2-ci kurs tələbələrinin dərslərinin aparılması üçün fizika, kimya və optik laboratoriyalar vardır. Yeni laboratoriyalardan UFAZ-la yanaşı ADNSU tələbələri də istifadə edəcəklər. Bundan əlavə, yeni laboratoriyaların açılışı tələbələrlə yanaşı ADNSU-da çalışan alimlərin birgə səyi ilə UFAZ-ın gələcəkdə həm də tədqiqat universitetinə çevrilməsinə zəmin yaradacaq.

İyulun 25-də Azərbaycan-Fransız Universitetinə (UFAZ) qəbul imtahanı keçiriləcək. İmtahanın nəticələri iyulun 27-də saat 12:00-da açıqlanacaq.

UFAZ-a qəbul imtahanında Dövlət İmtahan Mərkəzinin I ixtisas qrupu üzrə təşkil etdiyi imtahanlarda 500 və daha çox bal toplamış abituriyentlər iştirak etmək hüququna malikdir. UFAZ-da hər bir ixtisas üzrə 30 dövlət sifarişli və 10 ödənişli əsaslarla, ümumilikdə 160 tələbənin qəbulu nəzərdə tutulur.

 23/07/2018

http://asoiu.edu.az/az/news/594-2018-2019-cu-tedris-ilinde-ufaz-in-yeni-laboratoriyalari-istifadeye-verilecek

   

                  

                        Avropa tipli təhsil ocağımız - UFAZ

     Bu günlərdə Azərbaycan-Fransız Universitetinin yeni binasını ziyarət etdim. Universitetə dəyərli dostum, xalqımızın parlaq aydınlarından hörmətli Dr. Vazeh Əsgərov rəhbərlik edir. Ali məktəbin binası 2017-ci ilin dekabr ayında istifadəyə verilib.

      Binanın təmir və dizaynı insanı yormur. İlkin görünüş ali təhsil ocaq haqqında fikirlərin formalaşdırır. Əsas odur ki, binanın içində nələr baş verir? Baş verənlərdən məmnun qalmamaq mümkün deyil. Ali məktəbdə yaradılan şərait və tələbələrin intellektual səviyyəsi şəxsən məni heyran etdi. Yüksək səviyyəli təşkilatçılıq məktəbdə olan ab-hava tələbələrin ovqatlarında da hiss olunurdu. Təhsil olacağında dostluq, mehribançılıq mühiti hakimdir. Ali məktəbin direktoru Vazeh müəllim məni ali məktəblə yaxından tanış etmək üçün bir-bir otaqları gəzdirdi.

      Avropa standartlarına cavab verən laboratoriya yaradılıb. Sankı özümü Fransanın nüfuzlu ali məktəbində hiss edirdim. Tələbələrin inkişafı üçün hər cür imkan və şərait yaradılıb. Tələbələr kitabxanalarda vaxt keçirirlər və öz üzərlərində çalışırlar. Vazeh müəllim tələbələrin səviyyəsindən çox razıdır. Onların gələcəyinə böyük ümidlər bəslədiyini qeyd etdi.

          Fransada erməni lobbisinin güclü olduğunu nəzərə alsaq, belə bir məktəbin fəaliyyət göstərməsi hava-su kimi lazımdır. Sabah buranı bitirən tələbələr ölkəmizin texnoloji inkişafına öz töhfələrini verəcəklər. Bu gün təhsil ocağı iki ölkə arasında əlaqələrin inkişafında rol oynayır.

Elnur Eltürk

P.S. Qeyd edim ki, Vazeh müəllim bu yaxınlarda Fransada Azərbaycanın Dostları Assosiasiyasının prezidenti Jan Fransua Mansel tərəfindən Azərbaycan-Fransa dostluq əlaqələrinin genişləndirilməsində göstərdiyi xidmətlərinə görə Fransa Parlamentinin medalı ilə təltif olunub.

http://www.moderator.az/news/231629.html